‘n Opname wat wys hoe ‘n langvinger-lemur smul aan die inhoud van sy snoet, laat wetenskaplikes nou glo dat hierdie handeling dalk gesond mag wees.
Die lemur, genaamd die aye-aye, is een van 12 primaatspesies insluitend homo sapiens bekend vir in die neus grawe, en om dan die inhoud van hul fonds te eet.
Wetenskaplikes glo dat hul bevindinge die funksionele rol en voordele van neuskos kan bewys.
Anne-Claire Fabre, ‘n wetenskaplike medewerker by die Natuurhistoriese Museum in Londen wat hoofskrywer van die studie was, het gesê neuskrap mag gesondheidsvoordele inhou.
“Een studie toon dat om in jou neus rond te krap bakterieë soos Staphylococcus kan versprei, terwyl ‘n ander bevind dat mense wat hul eie snollies eet, minder gaatjies in hul tande het,” aldus Fabre in ‘n onlangse The Times berig.
Die hoofskrywer het onthou hoe sy in 2015 ‘n lemur afgeneem het wat in sy neus krap. Die resultate het haar uit die veld geslaan.
“Ek was werklik verbaas oor hoe ver daai vinger kon gaan, want die aye-aye se middelvinger is besonder lank, en hy het die hele lengte van die vinger in sy neusholte afgedruk. Ek het gewonder wat van daai vinger geword het.
“Ek was ook verbaas om ‘n ander primaat as die mens te sien wat in sy neus krap en het gewonder hoeveel ander spesies in hul neuse krap en hoekom hulle dit doen. Is dit funksioneel relevant?” het Fabre gewonder.
Die lemur se vingers maak ongeveer 65% uit van sy hand, so die dieptes wat in hul neuse bereik kan word is nie regtig verbasend nie.
Die navorsingspan het ‘n CT-skandering gebruik om te bevestig dat die lemur sy neus se inhoud oes vir kos as hy honger is.
Die span het ook ontdek dat die diere se vingers dikwels tot in hul kele kan reik.
Terwyl navorsing daarop dui dat daar gesondheidsvoordele mag wees vir ‘n lemur (of mens) wat in sy neus krap, word daar ook vermoed dat die gewoonte te danke is aan neus-kos se tekstuur, krakerigheid en soutigheid.
Saamgestel deur Dylan Bettencourt
Hierbo: Langvinger-lemur
Beeldbron: @SmithsonianMagazine
