Deur Anita Dangazele
As dit nie vir ‘n Uber-bestuurder se oplettentheid was nie, kon ‘n jong vrou van Gqeberha se lewe op ‘n noodlottige Saterdag in Februarie 2020 geëindig het.
Natasha Mulusa het met depressie gesukkel en was op die punt om selfmoord te pleeg toe sy ‘n Uber-rit van Walmer na Gqeberha Sentraal versoek het.
En toe ontmoet sy vir Bartho Dick, die man wat haar lewe met net een drukkie sou red.
Vier jaar later het Natasha, wat sedertdien na Nederland verhuis het, ‘n Facebook-plasing geskryf om Bartho te probeer opspoor.
Natasha het die gebeure van daardie dag gedeel en gesê toe sy in die motor klim, het sy voorgegee dat sy oukei is, maar toe Bartho haar vra hoe dit gaan, kon sy haarself nie keer nie. Sy het in trane uitgebars.
Hy het aan Scrolla.Africa gesê hy was net drie weke lank ‘n Uber-bestuurder toe hy haar versoek vir ‘n e-rit aanvaar het.
“Ek het haar in Walmer opgetel. Sy was op pad na Sentraal. Ek kon sien sy is nie lekker nie. Ek het haar gevra of dit goed gaan en sy het begin huil. Iets in my het gesê ek moet van die pad af te trek en haar omhels,” het hy gesê.
“Ek het gevra of ek iewers kan aftrek en sy het ingestem.”
Natasha het gesê met die hoë vlakke van geslagsgeweld en vrouemoord in hierdie land, was sy huiwerig om ja te sê.
“In my kop het ek gebid ‘moenie dat hierdie man probeer voordeel trek uit die situasie nie’, maar iets in my gees kon voel dat hy deur God gestuur is,” het sy gesê.
Sy het vertel hoe hy vir haar gesê het om uit die kar te klim en daar, langs die pad, het hy haar omhels terwyl sy snik.
Sy het gesê sy het nog nooit baie besonderhede gedeel oor wat in haar lewe gebeur het nie, maar hy het haar ‘n woord van God gegee.
“Ek onthou nie sy presiese woorde nie, maar ek onthou goed dat dit my baie gehelp en genees het,” het sy gesê.
“Hy kon dit nie weet nie, maar op daardie dag was ek gereed om selfmoord te pleeg. Ek was gereed om alles te beëindig en die handdoek in te gooi. Ek was uitgeput.”
Sy het Bartho bedank vir daardie toevallige dog lewensreddende ontmoeting.
‘n Emosionele Bartho het gesê elke keer as hy verby die plek ry waar hy Natasha opgelaai het, wonder hy wat van haar geword het.
“Ek is bly dat sy lewendig is en haar beste lewe uitleef,” het hy gesê met trane wat oor sy gesig stroom.
“Hierdie boodskap het my laat besef ek is presies waar God wil hê ek moet wees, en ek kan ‘n verskil maak.”
Natasha het Maandag gedeel dat sy ‘n video-oproep met die e-bestuurder gehad het.
Die plasing het gelui: “Aan almal wat die plasing gedeel het, uit die diepte van my hart, dankie! Ek het hom gekry en ons het gevideobel, gehuil en gelag. Eer aan God!”
Op die foto hierbo: ‘n Skermskoot van die video tussen Natasha Mulusa, inlas, en Bartho Dick
Bron: Verskaf
