Deur Doreen Mokgolo
Selfs nie ‘n hospitaalbed kon in die pad staan van ‘n Daveytonse egpaar, Thabo Maboi en Paulina Mogale, toe hulle na 28 jaar saam uiteindelik die knoop deurgehaak het nie.
Die paartjie is Sondagaand getroud tydens ‘n private seremonie wat in die bruidegom se siekesaal by Far East Rand Hospitaal gehou is. Dit is bygewoon deur hospitaalpersoneel, die familiepastoor, hul seun Karabo, 27, dogter Dineo, 21, en ‘n handjievol vriende.
Die bruidegom was op 2 Desember saam met sy strooijonkers in ‘n motorongeluk betrokke nadat hulle hul trou-uitrustings gaan aanpas het.
Thabo het sy ruggraat in die ongeluk beseer en die funksie van albei sy bene verloor. Op kort termyn het dit gedreig om die egpaar se langverwagte troudag, oorspronklik vir 9 Desember beplan, uit te stel.
Thabo het in gesprek met Scrolla.Africa gesê hulle het besluit om voort te gaan met die huweliksvoorbereidings en die viering, want hul tradisie bepaal dat hulle nie ‘n vasgestelde troudatum mag uitstel nie – selfs al is daar dood in die familie.
“Ons seun Karabo moes my plek inneem tydens die eerste seremonie Saterdag by my vrou se familiewoning in Mpumalanga.
“Ek het die seremonie virtueel deur middel van video-oproepe bygewoon – alles van die afbetaling van die lobola-saldo tot die feesvieringe. Als het verloop volgens hoe ons dit beplan het behalwe dat ek nie persoonlik daar was om saam met die families te kuier nie,” het hy gesê.
Die egpaar het besluit om die hospitaal te nader om ‘n klein seremonie te hou om hul saamwees te verseël.
Die bruidegom vertel sy vrou het vir hom gesê dat hul verbintenis nie finaal sal wees as hulle nie hul troubeloftes opsê en hul trouringe nie deur ‘n pastoor geseën word nie.
Hy het die hospitaalpersoneel genader wat gehelp het om met die bestuur te skakel en daar is ooreengekom dat die egpaar hul klein seremonie in die hospitaal sou aanbied.
Die unieke onthaalsaal het gespog met al die kleurvolle versierings wat Sondag by die bruidegom se huis gebruik sou word.
Op die foto hierbo: Pasgetroudes Thabo Maboi en Paulina Mogale
Bron: Verskaf
