Deur Doreen Mokgolo
Gospel-musikant Zaza Mokhethi het Vrydag haar sewende album, Shabach Shofar Chronicle, vrygestel te midde van teenstand deur Christelike groepe.
Wedergebore Christene glo dat sy verkeerd was om in te stem tot ‘n onderhoud met die bekende sangoma Gogo Skhotheni op haar potgooi ‘The Venting Podcast’.
Na afloop van die onderhoud het baie mense dit uitbasuin dat die musikant ‘n gulde geleentheid gehad het om Christus te verteenwoordig, die heerlikheid van God te openbaar en te preek, maar versuim het om dit te doen.
Die musikant, wat van Kwa-Thema in Ekurhuleni afkomstig is, het gesê haar musiek is universeel, en as Suid-Afrikaners besluit om nie haar nuutste album te koop en te ondersteun nie, dan sal diegene van buite die landsgrense dit doen.
“My ondersteuners en bewonderaars kom meestal van buite on grense. Ek het selfs toekennings in Tanzanië, Londen en die Verenigde State gewen weens hul volgehoue ondersteuning.
“Ek is nie ‘n lafaard nie en weier om geboelie te word. Ek is nie spyt dat ek daardie onderhoud gedoen het nie; as ek nog ‘n geleentheid kry om so ‘n onderhoud op dieselfde platform te doen, sal ek dit weer doen. Ek is nie spyt daaroor nie!”
Die musikant het gesê diegene wat krities is, is nie kwaad oor die onderhoud nie, maar beswaard oor ‘n persoon wat openlik as tradisionele geneser praktiseer.
“Ek het haar nie gaan raadpleeg nie, maar het gegaan om ‘n onderhoud te voer oor my pad as ‘n wedergebore Christen en pastoor, en oor my gospel-loopbaan.
“Daar is diegene wat aanvanklik kwaad was vir my, maar nadat hulle met my gepraat het, het hulle my besluit verstaan om op daardie spesifieke platform ‘n onderhoud te voer,” het sy bygevoeg.
Haar 13-snit album sluit ook drie ander kunstenaars in: Aerather Anderson van Londen, Cestine Donka van Ghana, en Yandisa Botaha van KZN.
Die musikant het bygevoeg dat die album vir elke smaak voorsiening maak, insluitend Sondagskoolkinders wat mal is oor ‘n liedjie genaamd ‘Vava Voom’.
Mokhethi het gesê die album sal genesing en ‘n boodskap van waarheid bring.
Op die foto hierbo: Zaza Mokgolo
Bron: Verskaf
