Deur Lucky Vince Pienaar
Protea kaptein Temba Bavuma het in ‘n nou veelbesproke verklaring aan TimesLive gesê die gedagte om voor die Krieketwêreldbeker-halfeindstryd teen Australië uit te tree, het nooit by hom opgekom nie.
“Ek sal dit nooit oorweeg om in ‘n halfeindstryd uit te tree nie – dit sal ek nooit oorweeg nie,” het hy gesê.
Maar hy het ook gesê: “Besluite wat ek neem sal altyd vir die span se beswil wees.”
Wat as sy uittrede op daardie spesifieke dag die span sou verbeter?
Natuurlik, toe hy besluit het om die openingskolwer te wees, in plaas daarvan om ‘n ander speler sy plek te laat inneem, het hy nie verwag om in die eerste boulbeurt vir ‘n eend uit te gaan nie.
En sou dit nou, ná die wedstryd, nie vir hom beter wees om bloot te erken dat hy ‘n oordeelsfout begaan het nie?
Nou sit die arme man met die onbenydenswaardige taak om hul nederlaag in die halfeindstryd te verdedig deur uit te wys hoe goed hulle gevaar het in vergelyking met ander Protea spanne – en om sonder enige juigende skares by OR Tambo aan te kom.
Die waarheid is dat daar al vir baie seisoene ‘n nukkerigheid in die Protea kamp was, en ironies genoeg het Bavuma baie naby daaraan gekom om daardie houding te verbeter.
Hoeveel druk of ondersteuning hy van Krieket SA kry, weet niemand nie. Die organisasie het tradisioneel die reputasie – reg of verkeerd – dat dit ‘n afbrekende politieke agenda het.
En Bavuma het goed gevaar met daardie opdraande pad.
Hy vra met watter maatstaf mens ‘n goeie kaptein meet.
Wel, jy kan nie. Jy kan nie houding met statistiek meet nie. Jy kan nie durf meet nie, jy kan nie gees of die begeerte om te veg meet nie.
Maar jy kan dit sien en jy kan dit voel.
Of jy nou vir Australië haat of hulle bewonder, hulle het daardie gees. Hulle wen nie altyd nie, maar hulle baklei altyd. In die eindstryd het hul vasberadenheid om te veg hulle handig te pas gekom.
Deesdae lyk dit of die Proteas nie paniekerig raak nie – hulle lyk net so vreeslik bereid om te verloor.
Hulle moet veggees ontwikkel, en sodra hulle dit het, kan hulle verwag om juigende skares by die lughawe te sien, wen of verloor.
Op die foto hierbo: Temba Bavuma en Quinton de Kock
Bron: X
