Winkeliers van die buiteland af wat in Kaapstad se Thabo Mbeki township handel dryf beweer dat hulle die slagoffer geword het van ‘n rooftog wat glo deur lede van die SAPD uitgevoer is.
Die voorval het Saterdag omstreeks 9.30nm plaasgevind.
Volgens een van die winkeliers, wat anoniem wil bly, het die SAPD-beamptes aan die winkel se deur geklop en dadelik gevra hoekom daar ‘n geweer op die perseel is.
“Hulle het ons beveel om te gaan lê en gemaak of hulle ons deursoek, maar dit was duidelik dat hul eintlike bedoeling was om ons geld te steel,” het hy gesê.
Die beamptes het voortgegaan om die winkel te deursoek en is met ‘n aansienlike bedrag van meer as R5,000 vort.
“Ons maak nie gewoonlik oop tydens beurtkrag nie, maar toe ons sien dat hulle polisiebeamptes is, het ons gevoel dis goed en het nooit vermoed dat hulle misdadigers is nie,” het een winkelier gesê.
Terwyl die winkeliers nog soos beveel op die grond gelê het, het die beamptes van die geleentheid gebruik gemaak om hulle te beroof.
“Hulle het ons gewaarsku om nie op te staan voordat hulle weg is nie,” het die winkelier bygevoeg.
Ná die voorval het die slagoffers na hul plaaslike polisiestasie gegaan in die hoop om ‘n saak teen die betrokke beamptes aanhangig te maak.
“Ek was geskok toe ek meegedeel is dat ek geen bystand kan ontvang nie omdat ek nie die voertuig se registrasienommer of hul name gehad het nie.”
Die beamptes het hul identiteite weggesteek. Hulle het nie naamplaatjies gedra nie en het hul gesigte bedek, wat beteken dat die slagoffers hulle op geen manier kon identifiseer nie.
“Dit lyk of die beamptes wat ons geld gesteel het met hul misdaad gaan wegkom,” het die winkelier gesê.
Lulamile Bzana, ‘n 45-jarige inwoner, het oor ‘n selfs meer ontstellende tendens gepraat en beweer dat SAPD-beamptes al lank reeds geld van buitelandse burgers eis.
“Hulle het gewoond geraak daaraan om goed uit buitelandse burgers se winkels te vat,” het Lulamile gesê.
In reaksie op hierdie bewerings het Wes-Kaapse SAPD-woordvoerder Kaptein Frederick van Wyk beklemtoon dat hul lede verbind is tot ‘n gedragskode.
“Die klaer word ten sterkste aangemoedig om ‘n klag by die polisiebestuur of Ipid in te dien vir ‘n dissiplinêre ondersoek na hierdie bewerings,” het Van Wyk gesê.
Geskryf deur ‘n Scrolla.Africa verslaggewer
Op die foto hierbo: Buitelandse winkeliers is na bewering deur SAPD-lede van meer as R5,000 beroof
Bron: Verskaf
