Ondanks die feit dat Eskom op die randjie van bankrotskap staan, begewe die maatskappy hom nou in ‘n multimiljoenrand missie vir ‘n nuwe openbare beeld.
Suid-Afrika se kragvoorsiener is op soek na ‘n nuwe voorkoms, en loods ‘n tender om logo’s te ontwerp en ‘n vars korporatiewe identiteit te skep vir sy drie nuwe filiale – Generasie, Transmissie en Distribusie – sowel as enige toekomstige Eskom Groep entiteite.
Agentskappe word gevra om te werk met ‘n allemintige R5 miljoen begroting per entiteit.
Die tender behels nie net ‘n nuwe logo nie. Dit is kwansuis ‘n groot taak, wat alles bevat van gedrukte en digitale materiaal tot bemarkingsfoefies en aanlynbates.
En dit is net die begin. Om ‘n handelsmerk te vernuwe beteken die vervanging van logo’s op geboue, op allerhande materiale, en op verskeie digitale platforms, het MyBroadband berig.
Terwyl Suid-Afrikaners worstel met ‘n verhoging van 31.4% in elektrisiteitstariewe oor twee jaar en die voortslepende bedreiging van beurtkrag, bevraagteken baie Eskom se besluit om met ‘n logo-vernuwingsprojek te spog.
Ghaleb Cachalia, die DA se woordvoerder vir openbare ondernemings, is vrygewig met sy kritiek. Hy haal Eskom oor die kole vir sy “verstommende” prioriteite, veral in ag genome die maatskappy se lewensondersteuningstelsel wat afhanklik is van reddingsboeie wat deur belastingbetalers gefinansier word.
Cachalia doen ‘n beroep op waarnemende Eskom HUB Calib Cassim om hierdie tender – wat hy uitkryt as dwaas en ‘n algehele wanspandering van fondse – in die kiem te smoor.
Terwyl Eskom besig is om nuwe lettertipes en kleurpalette te oorweeg, stel Cachalia voor dat die nutsreus eerder sy energie (en geld) moet kanaliseer om opwekkingskapasiteit te verhoog en beurtkrag vir eens en altyd te voorkom.
Saamgestel deur personeelskrywer
Op die foto hierbo: Eskom logo
Bron: X
