Deur Lucky Maree
➤ Minute voor afskop:
Ná die All Blacks se vertoning teen Argentinië, moet die Suid-Afrikaners ‘n groot oorwinning behaal om ‘n indruk te maak voor volgende week se eindstryd.
Die weer het gedraai en Parys is reënerig en koud. Die Bokke moet die beste maak van die nat toestande wat Engeland bevoordeel. Maak dit die skepdoel ‘n selfs gevaarliker wapen vir Owen Farrell?
➤ 1ste helfte:
Om ná tien minute ses punte agter te wees, is nie op sigself ‘n ramp nie – maar die Springbokke moet ‘n paar moeilike besluite maak en hulle lyk ongemaklik. Om strafskoppe in skopbare posisies af te staan, beter nie ‘n gewoonte word nie. Engeland 6-0.
Suid-Afrika kry ‘n skopbare strafskop maar hulle besluit eerder op die lynstaan. Maar weereens verloor die Springbok-voorspelers besit.
‘n Vreemde begin deur Suid-Afrika. Hulle beter rustig raak – en hoe gouer hoe beter.
Owen Farrell doen wat Owen Farrell doen: hy verskree skeidsregter Ben O’Keeffe tot so ‘n mate dat ‘n strafdoel 10 tree vorentoe geskuif word, en Manie Libbok die Bokke met ‘n driepunter op die telbord kry. Engeland 6-3.
‘n Minuut later word Damian Wilemse in besit uitgevang, staan so ‘n strafdoel af, en ná 25 minute loop Engeland met drie strafskoppe teen een voor. Engeland 9-3.
Die Suid-Afrikaners het drie keer agtereenvolgens bal besit verloor by die afbreekpunt, en steeds nie hul engin in rat nie.
Vir die tweede keer gooi Bongi Mbonambi die bal skeef in en weereens is Engeland op die voorvoet.
Op 30 minute is Manie Libbok se laaste bydra tot die wedstryd ‘n aanslaan in oop spel. Hy word deur Handré Pollard vervang. ‘n Meesterslag of ‘n desperate waagstuk? Ons sal uitvind.
Pollard kry ‘n strafskop en dus ‘n maklike drie punte. Die wankelende Springbokskip is ietwat gestabiliseer. Engeland 9-6.
Een minuut voor rustyd gee ‘n strafdoel Engeland weer ‘n voorsprong van ses punte. Engeland 12-6.
Halftyd. Vergeet van ‘n sterk stelling maak met die oog op die eindstryd – die Springbokke is aan’t veg om oorlewing.
➤ 2de helfte:
Tydens die pouse begin die reën neersak. Dit lyk of weerstoestande dinge vir die Springbokke nog moeiliker maak terwyl Engeland blykbaar baie gemakliker is.
Damian Willemse het bottervingers by die kantlyn en Engeland kry die lynstaan naby die Springbok-doellyn. Weer het die Bokke ‘n noue ontkoming.
Die Springbokke se plaasvervangers begin op die veld opkom. Wanneer Eben Etzebeth die veld verlaat word hy om een of ander rede luidkeels uitgejou. Etzebeth, die man wat ‘n week gelede ‘n reus teen Frankryk was, was grootliks onsigbaar.
Willie le Roux kom druk amper ‘n drie maar die dooie bal wen die wedloop. In plaas daarvan wen Engeland die bal van die afskop af en Owen Farrell maak die onvermydelike skepdoel. Engeland 15-6.
Die nat bal het Engeland beter gepas, maar dit is net een van die faktore wat hulle na die wenspan laat lyk. Met 20 minute oor lyk die Springbokke uiteraard verbysterd.
Die Springbok-skrum oorheers, maar die momentum wat hulle wen word gou deur hul agterspelers verkwis.
Vyftien minute speeltyd oor en die reën het opgehou. Uiteindelik kry die Bokke ‘n aanvallende lynstaan. Is dit die keerpunt?
Ja! RG Snyman roldraai sy pad oor die lyn vir ‘n drie. Engeland 15-13.
Vier minute oor en Suid-Afrika kry ‘n skrumstraf. Handré Pollard loop aan… en skop die spyker op die kop! Het die man ys in sy are? Suid-Afrika 16-15.
Speeltyd is verby met Engeland in besit. Kwagga Smith dwing ‘n aanslaan af. Pollard en die Suid-Afrikaanse skrum het ‘n geskiedkundige oorwinning en ‘n plek in die eindstryd gesteel.
Engeland (0 drieë) 15-16 (1 drie) Suid-Afrika
Op die foto hierbo: Springbokke vier hul oorwinning
Bron: X
