‘n Senior lid van die DA, Graham McIntosh, sê hy het bedank omdat hy nie langs Chris Pappas kon staan en kerklede vra om vir ‘n man te stem wat “met sy homoseksualiteit pronk nie”.
In ‘n brief aan die DA het McIntosh gesê hy kan nie met ‘n goeie gewete Pappas, die DA in KwaZulu-Natal se premierskandidaat, ondersteun nie, en dat hy hom eerder by die veelpartyhandves sal skaar, berig City Press.
McIntosh het gesê hy het gesukkel om saam te leef met Pappas wat “sy seksuele oriëntasie uitsaai”.
“Nou moet ek, wat na swart gemeenskappe moet gaan om stemme vir die DA in te win, sê: ‘Stem vir Pappas’ terwyl hulle vir my sê ‘hy wil met ‘n man trou’,” het McIntosh aan City Press gesê.
Hy het bygevoeg dat hy verstaan die swart gemeenskap is baie godsdienstig en dat hy nie voor kerkleiers kan staan en sê: “Ek ondersteun hierdie man (Pappas) nie.”
Die DA se leier in KZN, Dean MacPherson, het McIntosh se verklaring oor sy bedanking uit die party as “homofobies en bekrompe” afgemaak.
“Die DA glo dat die sienings van enigiemand wat op die punt is om by hul sewende politieke party aan te sluit, met ‘n groot sak sout gevat moet word,” het MacPherson bygevoeg.
McIntosh het gesê hy sal hom beywer vir die veelparty-handves, maar as hy by ‘n party moet aansluit, sal dit waarskynlik die IVP wees.
Saamgestel deur Anita Dangazele
Op die foto hierbo: Veteraanpolitikus en voormalige DA-lid Graham McIntosh
Bron: Facebook
