Deur Anita Dangazele
Die Oos-Kaapse regering het ‘n nuwe ‘A-span’ aangekondig wat bestaan uit vyf departementshoofde wat almal onderpresteer het in hul ampe.
Die span, wat die Projekondersteuningseenheid genoem word, se sending is om “die implementering van regeringsprogramme in verskillende velde op te skeprp”. Met ander woorde, hul taak sal wees om seker te maak dat die provinsiale regeringsdepartemente hul verpligtinge nakom.
Elke lid van die span is gekies juis omdat hulle versuim het om hul werk uit te voer. Oscar Mabuyane, premier van die Oos-Kaap, het erken dat dit gedoen is om langdurige skorsings of uitdagings in die Arbeidshof te vermy wat waarskynlik die gevolg sou wees as die amptenare afgedank is.
“Ons sal nie meer groot geld spandeer om mense te skors of mense hof toe te neem nie,” het Mabuyane Dinsdag tydens ‘n media-inligtingsessie gesê.
“Ons gaan saamwerk vir mense om hul kontrakte te voltooi – wanneer hulle nie daar sukses behaal nie, gebruik ons hulle elders.”
Met ander woorde, hulle word ‘n afdanking gespaar omdat die regering nie kan bekostig om van hulle ontslae te raak nie. Ondanks hierdie verleentheid ontvang hulle dieselfde salaris as voorheen.
Amptenare by die span ingesluit is Rolene Wagner (Departement van Gesondheid), Andile Fani (Samewerkende Regering en Tradisionele Sake), Mzi Mafani (Vervoer), Tabisa Poswa (Menslike Nedersettings) en Siphokazi Ndudane (Landelike Ontwikkeling).
Hulle sal by ‘n nuwe agt-lid-eenheid in die premier se kantoor aansluit.
Ander lede van die Projekondersteuningseenheid is adjunkdirekteur-generaal in die premierskantoor Mahlubandile Qwase, hoofdirekteur Busisiwe Khumalo, Maatskaplike Ontwikkeling waarnemende assistentbestuurder Athini Majikija, en Samewerkende Regering hoofdirekteur Mboniswa Nodlabi.
Die DA se Oos-Kaapse voorsitter, Yusuf Cassim, het gesê die stap onthul ‘n regering in ‘n staat van “voluit paniek”.
“Die waarheid is dat sy uitvoerende lede en hul departementshoofde nie daarin geslaag het om die uitdagings in hierdie departemente doeltreffend te hanteer nie,” het Cassim gesê.
“Die premier volg blykbaar dieselfde strategie as president Cyril Ramaphosa om beheer te sentraliseer, aangesien hy bang is en nie in staat is om sy LURe aanspreeklik te hou nie.”
Die regering het ook die waarnemende hoof van elke departement aangekondig: Sindiswa Gede (Gesondheid), Maud Madumane (Vervoer), Vuyo Mlokoti (Korporatiewe Bestuur en Tradisionele Sake), Bongikhaya Dayimani (Landelike Ontwikkeling en Landbouhervorming), en Edmond Venn (Menslike Nedersettings).
Op die foto hierbo: Oos-Kaapse premier Oscar Mabuyane
Bron: OK Premierskantoor/Facebook
