Vir byna 30 jaar was die moordenaar van rap-ikoon Tupac Shakhur ‘n raaisel, maar Vrydag het die polisie ‘n groot deurbraak gemaak in een van die wêreld se bekendste onopgeloste sake.
Duane ‘Keefe D’ Davis is van moord aangekla en sal in die hof verskyn insake die 1996 verbyry-skietery in Las Vegas, VSA.
Tupac, een van hip-hop se voorloper kunstenaars, was net 25 jaar oud toe hy vermoor is. Die tragedie het talle gerugte, verslae en dokumentêre programme laat ontstaan oor wie moontlik daaragter kon wees.
Tot nou toe is niemand egter nog ooit in verband daarmee in hegtenis geneem nie.
Davis, nou 60 jaar oud, was ‘n voormalige bendeleier in Los Angeles. Hy het aan die South Side Compton Crips behoort, terwyl Tupac geaffilieer was met hul bekende teenstanders, die Bloods.
Davis, sê aanklaers, het die skietery georganiseer. Hy was “ter plaatse in beheer van die poging om Tupac dood te maak”, het Steve Wolfson, die Clark-distriksprokureur, aan Associated Press gesê.
Dae voor die skietery het Tupac en lede van sy bemanning Davis se neef, Orlando Anderson, in die MGM Grand Garden Arena-hotel aangerand. Anderson is vir jare lank verdink as verdagte in Tupac se moord.
Op ‘n perskonferensie wat Vrydag gehou is, het die polisie hotelsekuriteitsbeeldmateriaal gewys van verskeie mans wat Anderson slaan en skop voordat veiligheidswagte die geveg opbreek.
Davis, het die polisie gesê, “het die plan georkestreer” in weerwraak vir sy neef. Hy het ‘n vuurwapen verkry en saam met Anderson en twee ander in ‘n wit Cadillac geklim en Tupac se motor gaan soek.
Kort voor lank het hulle dit gewaar, langsaan ingetrek en een van die mans het verskeie skote in die voertuig afgevuur. Die polisie het nie gesê wie die sneller getrek het nie.
Tupac is vier keer getref en is ses dae later in die hospitaal dood.
Vir meer as twee dekades het dit gelyk of die rapper se moord nooit opgelos sou word nie.
Davis het egter self die saak weer oopkraak deur in sy 2017-memoir te erken dat hy in die wit Cadillac was die aand wat Tupac gesterf het, en die laaste lewende getuie van sy moord was. Die drie ander passasiers is almal intussen dood.
Tupac word steeds beskou as een van die grootste en invloedrykste hip-hop-kunstenaars in die geskiedenis. Hy word geloof vir sy kletsryme oor sosiale kwessies soos bendemisdaad, seksisme en dwelmgebruik.
Hy het sedert sy dood meer as 75 miljoen plate verkoop.
Saamgestel deur Arthur Greene
Op die foto hierbo: Tupac Shakhur, links, en sy vermeende moordenaar, Duane ‘Keefe D’ Davis
Bron: Twitter
