Glans en glorie teen ‘n swart en goue agtergrond was kenmerke van die naweek se 17de jaarlikse Saftas (Suid-Afrikaanse rolprent- en televisietoekennings) by die Gallagher-konvensiesentrum in Gauteng.
Wat tot die geleentheid se uitbundigheid bygedra het, was die feit dat dit die eerste in-persoon toekenningseremonie was wat in drie jaar gehou is, na die Covid-pandemie virtuele geleenthede genoodsaak het van 2020 tot 2022.
Om te verseker dat al die regstreekse drama in styl afskop, het ‘n uitgestrekte rooi tapyt die gaste met aankoms ingewag. Die gashere van Saterdagaand se verrigtinge, mediapersoonlikheid Lawrence Maleka en Zozibini Tunzi, oftewel Mej Heelal 2019, het die aand se plesierige toon aangegee.
Tegniese toekennings is Vrydagaand in Gallagher Saal 3 uitgedeel, terwyl die hooftoekenningsgeleentheid Saterdagaand gehou en regstreeks op SABC3 en Mzansi Magic uitgesaai is.
Met die tema “Ons stories vloei saam”, het die toekennings ‘n ware vertoonvenster van die beste van Mzansi se rolprentmakers, akteurs en produksieboffins verskaf, en hulde gebring aan toppresteerders in ‘n menigte kategorieë.
Erkenning vir lewenslange bydraes tot die land se film- en TV-bedryf oor etlike dekades is toegeken aan Carte Blanche-anker en joernalis Derek Watts, wat in Augustus oorlede is, en die legendariese kinematograaf Koos Roets, 80.
Minister van sport, kuns en kultuur Zizi Kodwa, asook verteenwoordigers van die Nasionale Film- en Videostigting, insluitend waarnemende uitvoerende hoof Thobela Mayinje, het by die BBPs van SA se vermaaklikheidsbedryf aangesluit vir die geleentheid.
Mayinje het die wenners gelukgewens. “Ons is opgewonde oor al die rolprente wat nou by internasionale feeste en markte vertoon word,” het sy gesê, met die vermelding van films soos Sihle Hlophe se Lobola, A Bride’s True Price? vir die tentoonstelling van “die diepte van die Suid-Afrikaanse film- en televisiediskoers”.
Netflix SA en kykNET was die grootste wenners, met onderskeidelik 19 en 15 Goue Horings verower. Pambilimedia se Silverton Siege het 12 nominasies behaal en ses hiervan gewen, wat dit die mees bekroonde rolprent van Saftas ’23 maak.
Opmerklik wanneer die toekoms van SA se kreatiewe-ekonomie-industrie oorweeg word, is dat die toekenning vir Beste Studentefilm deur Shumba gewen is – die skepping van ‘n talentvolle jong produksiespan van AFDA se Joburg-kampus.
Justice Served, wat vir Netflix deur Meraki TV vervaardig is, was die top TV-dramareeks met drie toekennings, insluitend vir beste redigering, beste akteur en beste aktrise in ‘n dramareeks.
Lerato Mvelase – die betrokke ‘beste aktrise’ – kan egter om al die verkeerde redes onthou word. Sosiale media-gebruikers het gemengde gevoelens gehad oor die mate waarin Mvelase se partytjierok haar fantastiese figuur vertoon het.
Sommige het haar voorkoms geloof terwyl ander gesê het sy het ‘n bietjie te veel ontbloot. “Lerato is te oud vir so ‘n uitrusting. Haibo, Gogo,” het een X-gebruiker gesê. “Lerato, die ma van ‘n 16-jarige, dra steeds daardie nonsensrok?” het ‘n ander opgemerk.
Volgens The South African: “Mvelase, wat saam met haar twee dogters opgedaag het, het haar pragtige liggaamsbou gewys in ‘n glansryke deursigtige tweestuk. Haar romp, wat ‘n lang gleuf gehad het, het ook die swart g-string wat sy aangehad het afgewys.”
Vind ‘n volle lys van wenners hier: https://www.facebook.com/saftassa/
Saamgestel deur personeelskrywer
Op die foto bo: Lawrence Maleka en Zozibini Tunzi het Saterdagaand die 17de uitgawe van die Saftas saam aangebied
Bron: Bron: #SAFTAs
