Deur Anita Dangazele
Vir die eerste keer in agt jaar kan Nelson Mandelabaai ‘n sug van verligting slaak – vier van sy vyf balansdamme loop nou oor.
Hierdie tyd verlede jaar het dit gelyk of daar geen einde aan die droogte gaan wees nie, maar ná swaar reën die afgelope week het plaaslike damme vinnig vol geword.
Die metro se grootste toevoerdam, Impofu, was net meer as 20% vol; Churchilldam moes eers oorloop voordat Impofu kon opvul.
Saterdag het die Gamtoos-besproeiingsraad bevestig dat die Churchilldam oorloop – wonderlike nuus vir die droogtegeteisterde streek.
Die Algoa-watervoorsieningstelsel het Vrydag ‘n verklaring vrygestel wat die styging in damvlakke aan verlede naweek se swaar reënval toeskryf.
“Die Algoa-watervoorsieningstelsel staan op 49.8% na ‘n gesukkel van meer as twee jaar, waartydens watertoevoer in die Nelson Mandelabaai-metro beïnvloed is.
“Gedurende ‘n soortgelyke tydperk verlede jaar het die stelsel maar 19% aangeteken as gevolg van die ernstige droogte,” lui die verklaring.
“Die toename in die stelsel wat water verskaf aan damme in Nelson Mandelabaai word toegeskryf aan buie wat die afgelope naweek ervaar is en wat tot in die week gaan aanhou.”
Garth Sampson, streekwoordvoerder van die SA Weerdiens, het gesê dit sal naïef wees om te dink die stad is heeltemal uit die moeilikheid uit.
“Om beperkings in tye van oorvloed te verlig en dit in tye van gebrek te verhoog, is die enigste manier om daardie kurwe te verplat. Dit sal naïef wees om te dink dat ons nooit weer ‘n droogtesituasie sal ervaar nie,” het hy gesê.
“Hierdie ‘piek’ kan een of selfs baie jare duur, maar daarna moet ons regmaak vir die volgende droogte,” het Sampson gesê.
Die departement het egter geen inligting bekend gemaak oor die ophef van droogtebeperkings in die metro nie.
Mthubanzi Mniki, mediaskakelbeampte van die NMBM, het teen druktyd nog nie gereageer op vrae wat deur Scrolla.Africa gestuur is nie.
Op die foto hierbo: Kougadam
Bron: Gamtoos-besproeiingsraad
