Deur Everson Luhanga
Verkeer op die M1-hoofweg in Johannesburg het Woensdag tot stilstand gekom toe die polisie die snelweg afgesper en dit as misdaadtoneel behandel het.
Luitenant-generaal Tebello Mosikili, waarnemende nasionale kommissaris van die Suid-Afrikaanse Polisiediens (SAPD), het die reaksie deur die Gautengse polisie geprys omdat hulle die verdagtes binne enkele ure opgespoor en in hegtenis geneem het.
Mosikili het gesê die transito-rooftog het Woensdag om 5.15nm in Springs plaasgevind toe gewapende verdagtes ‘n geldwa tot stilstand gedwing het.
Die veiligheidswagte het pas geld by verskeie afsetpunte opgetel en was op pad na hul basis toe hulle ontwapen en die voertuig gebombardeer is. Die verdagtes het met ‘n onbekende bedrag geld weggekom.
Mosikili het gesê die Gautengse polisie het onmiddellik tot aksie oorgegaan.
“Alle moontlike hulpbronne is gemobiliseer. Lede verbonde aan die Direktoraat vir Prioriteitsmisdaadondersoek en die Johannesburgse Blitspatrollie het die verdagtes om 8nm op die M1 suid, net voor die Booysens-afrit opgespoor,” het sy gesê.
“‘n Skietgeveg het uitgebreek met die verdagtes wat in ‘n Toyota Quantum gery het. Een verdagte is op die toneel dood verklaar terwyl twee ander gevang is.”
Sy het gesê drie gewere is gevind en daar is beslag gelê op kontant en twee selfone.
Mosikili het gesê dat ‘n soektog na die oorblywende verdagtes voortduur.
Tydens die skietgeveg het een polisiebeampte ‘n skietwond opgedoen, en sterk nou in die hospitaal aan.
Sy het gesê die polisie bly op ‘n hoë gereedheidsgrondslag en is oorgehaal om sindikate te stop.
“Ons gaan voort om ernstige en gewelddadige misdaad in verskeie provinsies beslissend te hanteer. Ons gaan voort om sindikate en groepe wat by hierdie misdade betrokke is, vas te vat,” het Mosikili gesê.
Op die foto hierbo: Die misdaadtoneel
Bron: Verskaf
