Deur Zukile Majova
Cyril Ramaphosa het ‘n gedeelte van sy vyf minute toespraak aan die VN opgedra om te pleit dat wêreldnasies sanksies teen Zimbabwe en lede van die regerende Zanu-PF moet laat vaar.
Dit is ten spyte daarvan dat Zanu-PF onlangs oorwinning geëis het in ‘n betwiste verkiesing wat gevolg is deur intimidasie en arrestasie van lede van opposisie-politieke partye.
Die president het gesê sanksies teen Zimbabwe moet opgehef word aangesien dit ongekende lyding vir gewone Zimbabwiërs meebring.
“Suid-Afrika gaan voort om te vra vir die opheffing van ‘n ekonomiese embargo wat 60 jaar gelede teen Kuba ingestel is. Hierdie embargo het skade aan die land se ekonomie en lyding vir die mense van Kuba veroorsaak,” het hy gesê.
“Dit is soortgelyk aan sanksies wat teen Suid-Afrika se buurland, Zimbabwe, toegepas word. Dit moet opgehef word aangesien dit gewone Zimbabwiërs laat ly, en ook ‘n kollaterale impak op buurlande soos my eie land het.”
Build One South Africa stigter Mmusi Maimane het Ramaphosa op Twitter aangeval en gesê hy is ‘n vlagdraer vir Zanu-PF.
“Zanu-PF veroorsaak ongekende lyding vir gewone Zimbabwiërs. Van die Gukurahundhi-slagting tot die plundering wat in die goudmafia-dokumentêr uiteengesit word, tot verkiesingsbedrog en die skending van politieke regte,” het Maimane getwiet.
“Jy is aan die verkeerde kant van die geskiedenis, Mnr Ramaphosa. Jy laat Suid-Afrikaners ly weens jou blinde lojaliteit aan hierdie korrupte bevrydingsparty.”
Hy het gesê Ramaphosa is meer lojaal aan Zanu-PF as gewone Suid-Afrikaners.
“Suid-Afrikaners byt die spit af weens die massa-immigrasie van Zimbabwiërs wat weghardloop van jou vriend Emmerson Mnangagwa,” het hy getwiet.
Intussen het politieke onverdraagsaamheid, intimidasie en die arrestasie van dosyne lede van die opposisie Citizens Coalition for Change voortgeduur ná die verkiesing.
Die mees onlangse geval is die vervolging van CCC-LP en raadslid, Maureen Kademaunga, wat van poging tot moord en opsetlike saakbeskadiging aangekla is.
Op die foto hierbo: President Cyril Ramaphosa spreek die Verenigde Nasies se Algemene Vergadering toe
Bron: PresidensieZA
