In haar poging om ‘n passie vir wetenskap en sterrekunde aan te wakker, veral onder jong meisies, bied Murabana toere aan in Kenia om die wonders van die kosmos bekend te stel.
Tydens haar grootwordjare in die Oos-Afrikaanse nasie het sy gedink wetenskap is slegs vir seuns beskore en sy het nooit ‘n toekoms gesien wat haar hemelwaarts sou du neem nie. Haar belangstelling in die sterre is egter in haar 20’s aangewakker.
Vandag is Murabana en haar man, Daniel Chu Owen, die eienaars van Star Safaris, en bied hulle openbare ekspedisies aan na gebiede sonder ligbesoedeling. Hier neem hulle astronomiese gebeurtenisse soos die Perseid-meteoorreën waar.
Die inkomste van hierdie toere finansier die egpaar se ‘Travelling Telescope’.
Dit is in 2014 van stapel gestuur en fokus daarop om gemeenskappe meer te leer oor die wonders van die heelal, hoofsaaklik skoolkinders in landelike gebiede.
Murabana en Owen gebruik ‘n opblaasbare planetarium en ‘n kragtige teleskoop om tot 300 kinders op ‘n slag aan die geheime van die ruimte bloot te stel.
Hulle bespreek die basiese beginsels van astrofisika, planete en konstellasies.
Tot dusver het die egpaar die bekoring van die naghemel met ongeveer 400,000 mense gedeel.
‘n Groot motivering vir Murabana is om die idee’s rondom wetenskap in Kenia te verander.
“Daar is ‘n wanopvatting hier dat wetenskap en sterrekunde aan die Weste behoort en te uitdagend is, of net vir seuns bedoel is,” het sy volgens The Guardian gesê.
Met erkenning van haar invloed, het die VN vir Murabana in 2021 gekies vir hul Space4Women-program, wat ervare vroue in die ruimtesektor met ontluikende vroulike wetenskaplikes in aanraking bring.
As sy oor haar loopbaan besin noem Murabana vir Dr Mae Jemison, die eerste swart vrou in die ruimte, as bron van inspirasie.
In haar woorde: “Ek hoop dat ek deur ons reisende teleskoop die ambisie kan aanvuur wat die eerste Afrika vrou na die ruimte sal lanseer.”
Saamgestel deur personeelskrywer
Op die foto hierbo: Susan Murabana wys vir kinders die wonders van die ruimte
Bron: Travelling Telescope
