Sekere spinnekoppe wen hul geliefdes se guns met ‘n heerlike insekhappie voordat hulle hul skuif maak.
Maar wanneer stresvlakke die hoogtes inskiet, bedien hierdie agtbeen Romeo’s eerder ‘n leë “wegneemhouer”!
Ontmoet die Paratrechalea ornata-spinnekop, bekend vir sy naatlose verleidingsfoefies.
Om ‘n spinnekopwyfie se knieë lam te maak, sal ‘n mannetjie ‘n insek vang, dit in ‘n netjiese sybal verpak en dit aan haar voorhou.
As sy daarvoor te vinde is, sal sy die sy fyn verteer om die lekkerny binne te bereik terwyl die mannetjie sy ding doen.
Maar sommige mannetjies ruil die fynproewersmaaltyd vir ‘n spreekwoordelike leë dop.
In plaas van lekker goggas, oorhandig hulle blare of selfs insekoorskiet waaraan hulle klaar geëet het.
Navorsers, gelei deur bioloog Maria Albo van die Universiteit van die Republiek in Uruguay, het gevind dat hierdie kulinêre bedrieërs opduik wanneer die omgewing uitdagend raak, het LiveScience berig.
Hulle het twee spinnekoppopulasies in verskillende habitatte bestudeer. Die een het ‘n kalm klimaat gehad, terwyl die ander een op ‘n spannende tuimeltreinrit was danksy onvoorspelbare weer.
In die rustige woonbuurt het mannetjies slegs sowat 38% van die tyd waardelose geskenke aangedra. Maar in ‘n stresvolle buurt het ‘n verbysterende 96% van hulle sub-standaard wegneemete’s aangebied.
Hoekom? Wel, dit wil voorkom asof die gespanne spinnekoppe al die kos nodig het waarop hulle hul kloue kan kry vir hul eie oorlewing in ‘n onvoorspelbare habitat.
Ook in die matige habitat, waar kos volop is, wil groter wyfies ‘n spoggerige maaltyd hê voor paring om sodoende te verseker hul nageslag is blosend gesond.
Saamgestel deur personeelskrywer
Op die foto hierbo: Paratrechalea ornata spinnekop
