Deur Anita Dangazele
Polisieminister Bheki Cele het Vrydag tydens ‘n besoek aan Gqeberha erken dat die Suid-Afrikaanse Polisiediens nie die oorlog teen misdaad in die Oos-Kaap op sy eie kan wen nie.
Cele het saam met nasionale polisiekommissaris generaal Fannie Masemola en sy bestuurspan die stad besoek om Operasie Shanela van stapel te stuur – ‘n verskerpte en aggressiewe reaksie op misdaad.
Hy het ‘n beroep op staatsdepartemente gedoen om dringend die wortels van misdadigheid uit te grawe in gebiede wat met hoë misdaadvlakke en bendelede worstel.
Cele het gesê hy het tydens ‘n uitstappie in Gelvandale met kommer kennis geneem van die groot aantal kinders van skoolgaande ouderdom wat gedurende skoolure ronddwaal.
“Hierdie gebiede het veel meer nodig as wetstoepassing om lewens te verbeter. Dit is baie duidelik dat polisie alleen nie die oorlog teen misdaad sal wen nie.”
“Die groot aantal kinders wat nie skool toe gaan nie, dryf hulle tot misdadigheid en bendes. Dit is hoekom ons weer ‘n beroep doen op ‘n hele regering en die hele samelewing om misdaad te bekamp,” het hy gesê.
Cele het staatsdepartemente versoek om in te spring om misdaad en ander maatskaplike euwels uit te roei.
“Wat duidelik is hier, is dat die polisie of wetstoepassing alleen nie die oorlog kan wen nie… met dwelms, en die groot aantal kinders wat nie skool bywoon nie. Jy sien jongmense van 16 en 17 jaar oud wat sê hulle is klaar met skool. Dit lei tot bendes en misdadigheid.”
Sedert die begin van Operasie Shanela in Mei het sowat 10,000 arrestasies tydens optredes in die Oos-Kaap plaasgevind.
Op die hierfoto: Bheki Cele, minister van polisie, tydens ‘n wandeling in Gelvandale, Gqeberha
Bron: Lirandzu Themba
