Yevgeny Prigozhin, die leier van Rusland se berugte huursoldaatgroep, Wagner, is glo in ‘n vliegtuigongeluk in Rusland dood.
Rusland se lugvaartowerheid het bevestig dat al 10 passasiers aan boord van die straler in Woensdag se ongeluk dood is. Prigozhin is as een van die passasiers gelys.
Vrae is onmiddellik oor die ongeluk gevra, aangesien Prigozhin, 62, in Junie ‘n mislukte staatsgreeppoging teen Russiese president Vladimir Poetin gelei het.
Vantevore het die Wagner-groep ‘n sleutelrol gespeel in Rusland se voortgesette inval in die Oekraïne.
Prigozhin, ‘n ryk sakeman met ‘n kriminele rekord, het die groep in 2014 gestig. Voor die inval in die Oekraïne was daar glo 5,000 soldate in sy geledere. Sedert die oorlog het Prigozhin gesê dat die getal tot meer as 25,000 gestyg het.
Buite die Oekraïne was die groep aktief in Rusland se militêre operasies in Afrika.
Net hierdie week het Prigozhin in ‘n video verskyn waarin hy beweer dat Wagner “Afrika vryer maak”.
Navorsingsgroepe dink die video is moontlik in Mali verfilm, waar Wagner-soldate daarvan beskuldig is dat hulle honderde burgerlikes vermoor het.
Die groep was ook betrokke by bedrywighede in die Sentraal-Afrikaanse Republiek en ander lande in sentraal Afrika.
Prigozhin het in Junie die internasionale kollig betree toe hy Poetin probeer uitdryf het. Wagner-soldate het na die hoofstad Moskou opgeruk nadat Prigozhin ‘n uitval gehad het met die land se ministerie van verdediging.
Die staatsgreep het vinnig verbrokkel sonder enige bloedvergieting, maar Poetin het Prigozhin ‘n verraaier genoem en wraak beloof.
Op die foto hierbo: Yevgeny Prigozhin, wat Maandag in Mali verfilm is, is Woensdag in ‘n vliegtuigongeluk in Rusland dood
Bron: Twitter
