Deur Zukile Majova
Die wêreldkampioenskappe wat hierdie naweek begin in Boedapest, Hongarye, bied ‘n unieke geleentheid vir Afrika se beste naellopers.
Sedert Jamaikaan Usain Bolt sy eerste Olimpiese goue medalje in Beijing in 2008 gewen het, was Afrika se bestes slegs strooimeisies in die 100m en 200m wedlope. Maar, helaas, nooit die bruid nie.
Die wêreldrekordhouer in die 100m (9.58), die 200m (19.19) en die 4x100m (36.84) aflos het na die 2017 wêreldkampioenskappe uitgetree.
Sedertdien was daar nog geen aanspraakmaker op sy troon nie. Terwyl die wêreldkampioenskappe Saterdag begin, is die wedloop om die wêreld te oorheers nog wawyd oop.
En vir die eerste keer in die geskiedenis het Afrika se bestes ‘n ware kans om naelloopglorie te behaal.
Ten minste drie Afrikane – Akani Simbine van Suid-Afrika, Ferdinand Omanyala van Kenia, en Letsile Tebogo van Botswana – mag in die 100m finaal verskyn.
Hulle is onder 11 Afrikane wat hierdie seisoen die 100m in minder as 10 sekondes gehardloop het.
Omanyala, Afrika se vinnigste man hierdie seisoen, het ‘n tyd van 9.84 by die Kip Keino Classic in Nairobi aangeteken, wat hom die tweede vinnigste man in wêreldatletiek in 2023 maak.
Slegs Brittanje se Zharnel Hughes (9.83) het vanjaar ’n vinniger tyd aangeteken.
Die opwindendste vooruitsig vir Suider-Afrikaanse lande is Tebogo, wat ‘n seisoenbeste van 9.93 aangeteken het.
Die 20-jarige is een van die bestes ter wêreld in die 200m, nadat hy onlangs ‘n Wanda Diamantliga-byeenkoms gewen het en vanjaar ‘n tyd van 19.50 in die 200m aangeteken het.
En Suid-Afrika se blits Simbine het die afgelope dekade onder die topvyf in elke Olimpiese Spele en Wêreldkampioenskapkompetisie geëindig.
Ja, hy is ver benewe sy persoonlike beste van 9.84, maar het ‘n indrukwekkende 9.92 aangeteken en sy bestendigheid bewys toe hy die Wanda Diamantliga in haglike weersomstandighede in Stockholm gewen het.
Die 37-jarige het ook vanjaar die wêreldkampioen Amerikaanse naelloper Fred Kerley by die Silesia Diamond League geklop.
Niemand verwag dat iemand Bolt se naellooprekords gaan breek nie, maar Afrika was nog nooit sedert die Namibiër Frankie Fredericks se dae ‘n groter bedreiging vir die wêreld nie.
Op die foto hierbo: Alle hoop sal die naweek rus op SA ster Akani Simbine
