Dokters, liedjieskrywers en selfs ‘n vegvlieënier — ontmoet ‘n handjievol van Mzansi se mees merkwaardige en, in party gevalle, ondergevierde vroue.
Lilian Ngoyi
Bekend as die ‘Moeder van Swart Weerstand’ was Lilian Ngoyi ‘n vurige anti-apartheidsaktivis wat haar kragtige stem toegewy het aan die bevordering van vroueregte en die bevryding van swart vroue in Suid-Afrika.
Sy was die eerste vrou wat tot die ANC Uitvoerende Komitee verkies is en het ook as President van die ANC Vroueliga gedien. Ngoyi se leierskap was deurslaggewend in die vorming van die Federasie van Suid-Afrikaanse Vroue (Fedsaw), en hierdie verbintenis het gelei tot ‘n geskiedkundige protes teen die insluiting van vroue in diskriminerende paswette.
Majoor Mandisa Mfeka
Mandisa Mfeka het geskiedenis herskryf as die eerste swart vrou wat ‘n Suid-Afrikaanse vegvlieënier geword het.
Haar onwrikbare toewyding tot haar taak demonstreer haar veggees en vasberadenheid om die weg te baan vir toekomstige geslagte.
Helen Suzman
As meedoënlose voorstander van menseregte en rassegelykheid het Helen Suzman geskiedenis gemaak as stigterslid van die Progressiewe Party.
Vir meer as ‘n dekade in die Parlement het sy apartheidswetgewing vreesloos teëgestaan en haar posisie gebruik om die status quo uit te daag en onreg aan die kaak te stel. Suzman se uithouvermoë is verewig in haar 885 toesprake en 2,262 vrae wat daarop gemik was om apartheidsbeleid af te breek.
Miriam Makeba
Ook bekend as ‘Mama Africa’ en ‘Keiserin van die Afrika Lied’ het Miriam Makeba haar aangrypende musiek gebruik as instrument van weerstand teen apartheid. Haar kragtige stem het grense en tale oorskry, en verandering wêreldwyd teweeg gebring.
Makeba se nalatenskap het verder as musiek gestrek; sy het as Verenigde Nasies welwillendheidsambassadeur gedien, wat kritieke sake soos MIV/Vigs-bewustheid bepleit en mishandelde meisies ondersteun het.
Dr Pregaluxmi ‘Pregs’ Govender
Baanbreker vir vrouesake Dr Pregs Govender se impak op die regte van die land se vroue is beduidend. As die tweede Suid-Afrikaanse menseregtekommissaris en as ‘n LP het sy geslagsgelykheid bevorder, veral deur inisiatiewe soos die Vrouebegroting.
Govender se oortuiging dat vroueregte onderling verbind en ondeelbaar is, vorm steeds beleid en dryf verandering.
Hierdie merkwaardige Suid-Afrikaanse vroue het bande gesmee, versperrings verbreek en verandering aangeblaas in hul onderskeie velde.
Op die foto hierbo: Sommige van Suid-Afrikaanse se vele merkwaardige vroue
