Deur Nothando Makhubela
Lucia Simelane-Ochan is as Mev Curve Globe 2023 gekroon.
Sy kom van die skilderagtige dorpie Nelspruit in Mpumalanga en het bewys dat ouderdom net ‘n syfer is. As 42-jarige het sy haar goed van haar taak gekwyt tussen 77 ernstige mededingers van regoor die wêreld in Rancho Mirage, Kalifornië, VSA.
Die Mrs Curve Globe-kompetisie verwelkom vroue van grootte 12 en op, en inspireer hulle om van hul kurwes te hou en hul unieke skoonheid te vier.
Simelane-Ochan is ‘n internasionale sakevrou, en gaan nou as ambassadeur optree vir Mrs Curve Globe, die WIN Foundation en Feminine Boss.
Maar haar prestasies strek veel verder as haar pragtige voorkoms. Sy het ‘n graad in estetika en ‘n diploma in somatologie, wat bewys dat sy nie net mooi is van buite nie, maar ook kundig is in haar veld.
As eienaar van die OT Deyo Med estetika kliniek en stigter van NaBo’Ngwane Naturals-velsorgprodukte, is sy ‘n gekwalifiseerde velsorgspesialis wat weet hoe om mense op hul beste te laat lyk.
Toe Simelane-Ochan oor haar oorwinning gevra is, het sy met selfvertroue gepraat oor hoe sy in haarself glo. En sy is beswaarlik ‘n groentjie op die gebied. Sy het haar eerste kompetisie op 13 gewen en het sedertdien ander skoonheidstitels met grasie en elegansie opgeraap.
Sy kompeteer in haar eie klas en straal haar vroulikheid uit sonder enige druk om aan maatskaplike standaarde te voldoen. Dis nou vir jou bemagtiging!
“Ja, ek het geglo ek kan wen. Ek het gevoel dat ek geestelik en fisies gereed was om mee te ding, en ek het my goddelike vroulikheid en kurwes ten beste gebruik, met geen druk om gewig te verloor sodat ek kon inpas nie,” het sy gesê.
Sy is ‘n ware kampvegter vir verandering wat jong vroue en meisies bemagtig deur hul waardigheid te herstel met die verspreiding van noodsaaklike produkte en menstruele sorg. Sy is ook betrokke by veldtogte vir kankerbewustheid en deelname aan ekonomiese bemagtigingsprogramme.
“Ek doen voorspraak vir geslagsgelykheid, vrouebemagtiging in gemarginaliseerde gemeenskappe, en die herstel van waardigheid aan die mensdom deur die bevordering van positiewe volhoubare omgewingsimpakte wat werksgeleenthede skep om plattelandse jong vroue te help om vir hul gesinne te voorsien,” het sy gesê.
Op die foto hierbo: Die nuutgekroonde Mrs Curve Globe 2023, Lucia Simelane-Ochan
Fotobron: Verskaf
