Deur Buziwe Nocuze
Gemeenskappe in Kaapstad se swart inwoners wat deur die swaar reën en daaropvolgende vloede getref is, beskuldig owerhede daarvan hulle voorkeur gee aan woonbuurte met bruin inwoners wanneer hulle opruimingswerk doen.
Sivenathi Majojo van Mfuleni sê hy sien hoe ander gehelp word terwyl sy gemeenskap tevergeefs wag op hulp.
“Ek sien dit op Facebook. Hulle leiers plaas foto’s. Ek weet nie of dit ons raadslede is wat ons in die steek laat nie, maar ons staan altyd agter in die ry wanneer dit by dienslewering kom,” sê Majojo.
Hy en baie ander probeer nog om van die water ontslae te raak wat by hulle woonplekke ingespoel het met die stormweer.
“Die meeste mense het die gebiede as gevolg van die vloede verlaat. Dit was nie meer veilig om daar te bly nie. Ons het dringend hulp nodig.”
’n Ander inwoner, Mandisa Nokele, is erg teleurgesteld, en het gesê gaan dit nie daar laat staan nie.
“Ons is aan dié soort behandeling gewoond, maar dit beteken nie ons moet stilbly daaroor nie. Ons moet altyd baklei wanneer ons hulp nodig het,” het sy gesê.
Charlotte Powell, segspersoon vir Kaapstad se Ramp-risikobestuursentrum, gee toe dat die opruiming sloer.
“Die aanhoudende reën maak dit moeilik om die impak van die vloede te versag, soos oorspoelde paaie, kragonderbrekings en omgewaaide bome, maar die werk gaan voort.”
Sy sê Mfuleni is hoog op die prioriteitslys, saam met Philippi, Khayelitsha, Nyanga, Gugulethu, en Vygieskraal, en bygevoeg dat die droër dae wat voorlê die werk sal vergemaklik.
Nie-regeringsorganisasies, kerke en stadsinwoners neem komberse en kos na die geteisterde gebiede, aldus Powell.
In die foto hierbo: Inwoners van sommige van die vloed-geteisterde dele van Kaapstad voel hulle word deur die plaaslike regering afgeskeep
Fotobron: Verskaf
