Amper soos ‘n intense spel van dinosourus-Jenga, het wetenskaplikes die gefossileerde oorblyfsels van ‘n ondier opgegrawe wat 72 miljoen jaar gelede in Chili rondgedwaal het.
Die ontdekking van die plantetende dinosourus wat nog nooit tevore gesien is nie, het begin met ‘n ekspedisie in 2013 toe fragmente van vergeelde bene aan die onderkant van ‘n heuwel naby Torres del Paine nasionale park in Patagonië gevind is.
En nou, ná byna 10 jaar se gegrawe, is die waarheid uit: Chili het sy eie plantetende superster gehad!
Studieleier Jonathan Alarcon het erken dat hulle aanvanklik gedink het dit was maar net nog ‘n alledaagse Suid-Amerikaanse eendbek-oerdier.
Maar namate die navorsing gevorder het, het hulle besef dat daar op iets totaal ongekend afgekom is.
Om die raaisel van hierdie eienaardige wese te ontrafel, het paleontoloë meer as 100 stukke been versigtig uitgegrawe.
Hulle moes moeite doen om geen beendere in die proses te beskadig nie, en het waarskynlik “Moet asseblief nie verkrummel nie!” gefluister met elke stap van die opgrawings.
Maar nog was dit het einde niet. Hierdie toegewyde wetenskaplikes het hul bevindinge noukeurig met bestaande navorsing vergelyk om te verifieer dat hulle wel op ‘n splinternuwe spesie van oerdier afgekom het, het Sky News berig.
Nog meer opwindend is dat hulle die geraamte digitaal oorgebou het, wat lewe teruggeblaas het in Gonkoken-nanoi – in al sy glorie.
Daar word selfs beplan om ‘n 3D-afdruk van die dino-superdier te skep, sodat mens jou eie elektroniese weergawe van hierdie indrukwekkende herbivoor kan besit.
Gonkoken is ‘n samevoeging van twee woorde uit die taal van die inheemse Aonikenk-mense wat lank gelede in Patagonië gewoon het. “Gon” beteken soortgelyk aan, en “koken” beteken wilde eend of swaan.
So ons kan Gonkoken-nanoi beskou as die wilde neef van ons hedendaagse eende, net met baie minder vere en ‘n veel meer uitdagende houding.
Saamgestel deur personeelskrywer
Op die foto hierbo: Gonkoken-nanoi met sy oulike eendbek
Fotobron: Twitter
