Deur Anita Dangazele
Swaar reënbuie het neergesak op Nelson Mandelabaai, wat lank reeds deur droogte geteister word – maar nou is inwoners in baie dele van die metrogebied gestrand gelaat.
Terwyl die reën ‘n welkome verligting is vir die stad, wat tot nou toe met watertekorte gesukkel het, het dit verwoesting gesaai vir die inwoners in ‘n aantal townships, en die munisipaliteit genoop om inwoners te skuif en paaie as voorsorgmaatreël te sluit.
Sommige inwoners in vloedegebiede weier om na veiligheid te verskuif, omdat hulle vrees dat hul besittings gesteel sal word sodra hulle hul huise verlaat.
Nombeko Solani, 45, wat by die KwaNdokwenza informele nedersetting in Kwazakhele Township woon, het gesê sy sal eerder agterbly en seker maak haar besittings is veilig.
“Ek wil nie my meubels agterlaat nie, en sal liewer hier bly as om iewers veilig te wees en my goed sonder toesig te los,” het sy gesê.
Nog ‘n inwoner, Lindelwa Zumani, het beaam dat oorstromings nie die enigste ding is waaroor hulle kommer nie.
“Ons is nie net besorg oor die water wat ons meubels beskadig nie. Diewe vat ‘n kans in elke situasie. Hulle trek voordeel uit beurtkrag en ‘n vloed gaan hulle nie keer om met ons goed weg te loop nie.”
Raadslid vir veiligheid en sekuriteit Lawrence Troon het gesê die munisipaliteit sal deurgaans die situasie dophou. “Ons verwelkom die stortvloed omdat ons dringend reën benodig het na die druk greep van ‘n verwoestende droogte.
“Ons spanne is ontplooi en help diegene wat geraak is, en ons sal die geaffekteerde gemeenskappe bystaan waar moontlik en mense wat gewillig is, hervestig. Ongelukkig kan ons nie inwoners teen hul wil ontruim nie,” het hy gesê.
Die gebiede wat deur vloede geraak is sluit onder meer in Missionvale, Kwazakhele, New Brighton, Jachvlakte, 3rde Laan Dip in Newton Park, die M4, Uitenhage en Sidonweg, en Cuylerbrug in Kariega.
Op die foto hierbo: Oorstroomde Kwazakhele Township in Gqeberha
Fotobron: Verskaf
