Deur Buziwe Nocuze
Die hoë misdaadsyfer in Philippi Browns Farm het ‘n ernstige impak op inwoners se werksvooruitsigte.
Die gebied se reputasie vir misdaad loop hom ver vooruit, en daar word gesê dat maatskappye aansoekers aktief verwerp sodra hulle hoor dat hulle in Philippi woon.
Songeziwe Mvangwana, 30, het gesê ondanks die feit dat sy gekwalifiseer is om in ‘n restaurant te werk, is sy al drie keer afgekeur oor waar sy bly.
“Ek het aansoek gedoen vir ‘n pos en die bestuurder was eerlik genoeg om te beken dat ek gekwalifiseer het, maar hulle kan my nie aanstel nie vanweë die plek waar ek woon,” aldus Mvangwana.
Mvangwana het gesê die vervoermaatskappye het ook geweier om haar op en af te laai weens die gebied se misdaadsyfer.
“Ons kan hulle nie kwalik neem nie,” het sy gesê.
“Ons sien elke dag hoe motors van maatskappye en privaat eienaars in ons area gekaap word. Dit is tyd dat ons as gemeenskap saamstaan om misdaad te beveg.”
Thandiwe Ngandla, 28, het ook gesê sy het uitgemis op werk omdat sy in Philippi bly.
“Ouers wat weet dat hul kinders misdadigers is, moet na vore kom,” het Ngandla gesê.
“Ons kan nie werksgeleenthede misloop weens hul kinders se misdrywe nie.”
Inwoners van Philippi Browns Farm het vantevore self met kwaaddoeners afgereken, maar nou is die misdaad heeltemal buite beheer.
“Misdadigers vrees nie meer ons gebied nie, want die gemeenskap het opgehou om hulle kort te vat,” het een inwoner gesê.
Anele Madondile, voorsitter van die gemeenskapspolisiëringsforum in Sektor 4, het bevestig dat die misdaadsyfer daagliks toeneem.
“Die meeste misdade word voor die inwoners gepleeg, maar die mense gryp nie in nie omdat hulle vir hul lewens vrees,” het Madondile gesê.
“Ons moet saam met die SAPD werk sodat ons dit kan beveg. Gemeenskapslede moet hul deel doen deur misdaad aan te meld. Ons doen alles in ons vermoë om die SAPD by te staan.”
Op die foto hierbo: Philippi Browns Farm-inwoners voel die impak van misdaad wanneer hulle werk soek
Fotobron: Buziwe Nocuze
