Deur Lucky Maree
Is Siya Kolisi die ou wat, soos Moses, Die Beloofde land van anderkant die rivier kon sien, maar nooit kon binnegaan nie?
Aanvanklik, in Saterdag se wedstryd tussen die Sharks en Munster, het dit gelyk asof sy kniebesering nie te ernstig is nie.
Hy het in die sewende minuut op sy eie stoom van die veld af gehinkepink – altyd ’n goeie teken – en het na die tyd met toeskouers gesels.
Maar, soos wat gereeld met kniebeserings die geval is, is dit ernstiger as wat dit gelyk het.
Sy voorste kruisligament is beskadig. Dié ligament verhinder dat die knie agtertoe buig – wat presies so pynlik is as wat dit klink. Dit is moeilik om die knie tydens oefening te versterk, en moeilik om ná ’n besering te rehabiliteer.
Hy moes erge pyn verduur het toe hy uitgekom het om met ondersteuners te gesels.
Behandelingsopsies is beperk.
’n Operasie sal beteken dat hy sewe maande lank op die kantlyn bly – en die Wêreldbeker misloop. As hy op rehabilitasie besluit, sal hy enkele weke voor die toernooi weer kan speel.
Daar lê ’n ysingwekkende waarskuwing in die Springbokke se Wêreldbeker-verlede.
In 1999 het Nick Mallett besluit om die charismatiese leier Bob Skinstad bo Gary Teichman vir die Wêreldbeker in Wallis te kies.
Tot in daardie stadium was Mallett se rekord as Bokafrigter so te sê vlekkeloos, onder meer met 17 toetsoorwinnings op ’n streep.
Maar sy besluit om Skinstad ondanks ’n besering te kies, het Suid-Afrika moontlik die Wêreldbeker gekos. Hy het in 2003 erken dat dit ’n fout was.
Teichmann was ’n uiters gewilde kaptein en hardwerkende losvoorspeler. Maar Mallett het gemeen Skinstad is onontbeerlik as leier.
Die besering het sy bydrae onbenullig gemaak.
Dit is die stukkie geskiedenis wat kan dien as ’n rooi vlaggie vir Rassie Erasmus en Jacques Nienaber. Dit is ’n groot waagstuk om op ’n beseerde speler te dobbel, en eindig gewoonlik in trane.
Kolisi is een van die mees inspirerende leiers in Suid-Afrika se rugbygeskiedenis. Maar om sy span te kan inspireer, moet hy fiks wees.
Erasmus en Nienaber, twee van die voorste strateë in wêreldrugby, is hiervan bewus.
Maar Mallett is op dieselfde vlak gereken – totdat hy sy Wêreldbekerhoop op ’n beseerde speler gevestig het.
Die gode van Suid-Afrikaanse rugby – dis nou Nienaber moet Erasmus – sal reg moet kies.
In die foto hierbo: Siya word vir sy kniebesering behandel
Fotobron: Twitter
