Deur Razeen Gutta
Vrouekrieketspelers van Afganistan, wat in Australië in ballingskap lewe, droom steeds daarvan om weer die veld te betree ondanks die feit dat hul landswette dit verbied.
Toe die Taliban in Augustus 2021 beheer oor hul land neem, moes die groep dames na Australië toe vlug – en dit minder as ‘n jaar nadat die Afghanistan Krieketraad (AK) vir hulle kontrakte aangebied het.
Die Taliban het vroue verbied om sport te beoefen, tersiêre instellings by te woon of openbare parke te besoek. Veelsydigheidspeler Nahida Sapan het haar persoonlike ervaring gedeel.
“Ons het direkte dreigemente ontvang. Hulle het gesê: ‘Ons sal jou kry en as ons jou kry, sal ons nie jou lewe spaar nie. As ons een van julle kry, sal ons julle almal kry,” het sy aan BBC vertel.
“Ek is deur paniek oorval, my hande het gebewe. Ek was so bang, ek was getraumatiseer. Elke keer as daar ‘n klop aan die deur was, was al wat ek kon dink ‘Hulle het ons gekry, hulle gaan ons doodmaak’.”
Die 20-jarige is een van meer as 20 spanlede wat nou in Australië woon, met baie van die spelers wat beweer dat krieket se globale beheerliggaam, die IKR, nog geen kontak met hulle gemaak het nie.
“Ek wil nie hê die IKR moet van ons vergeet, of van die meisies in Afghanistan vergeet wat nog hoop om krieket te speel nie. Daar is baie meisies in Afghanistan wat daarvan droom om krieketspelers te word,” het Sapan gesê.
‘n Woordvoerder van die IKR het aan die BBC gesê hulle bly “toegewyd om die Afganistan Krieketraad te ondersteun, en straf nie die raad of hul spelers vir die nakoming van wette wat deur die regering van hul land vasgestel is nie”.
“Die IKR sal voortgaan om sy invloed konstruktief te gebruik om die AK te help om krieket- en speelgeleenthede vir beide mans en vroue in Afghanistan te ontwikkel,” het die woordvoerder bygevoeg.
Op die foto hierbo: Die Afganistan se vrouekrieketspan nadat kontrakte in 2020 aan hulle toegeken is
Fotobron: @espncricinfo
