Deur Everson Luhanga
‘n Vermeende reeksverkragter staan tereg op 145 aanklagte nadat hy glo 36 vroue in en om Benoni, Tembisa en Daveyton verkrag het.
Hy word ook daarvan beskuldig dat hy iemand gedwing het om ‘n seksuele daad te aanskou.
Lumka Mahanjana, segspersoon van die Gauteng-streek se Nasionale Vervolgingsgesag, het gesê ‘n vermeende reeksverkragter het Dinsdag voor die Daveyton-landdroshof verskyn.
Mahanjane het gesê die 38-jarige man, wat as sekuriteitsbeampte by Prasa gewerk het, staan tereg op 139 bykomende aanklagte, bo en behalwe die ses waarvan hy aanvanklik aangekla is tydens sy eerste verskyning in Januarie 2023.
“Hy staan tereg op 44 aanklagte van verkragting, 43 van ontvoering, 41 vir die rig van ‘n vuurwapen, asook 17 bykomende aanklagte van bedrog, dwarsboming van die gereg, en dat hy iemand gedwing het om ‘n seksuele daad te aanskou,” het sy gesê.
Mahanjane het bevestig dat die beskuldigde 36 vroue verkrag het in die genoemde gebiede tussen 2018 en Januarie 2023, toe hy gearresteer is.
“Die jongste slagoffer was ’n 14-jarige meisie, terwyl die oudste ‘n 33-jarige vrou was.”
Mahanjane het bygevoeg dat die verdagte sy slagoffers geteiken het terwyl hulle op pad was huis toe of werk toe, of vir ‘n taxi gewag het.
Sy het gesê die verdagte het ‘n vuurwapen gebruik en die vroue ontvoer deur hulle in sy motor in te dwing en na ‘n bestemming te ry waar hy hulle verkrag het.
“Die beskuldigde is op 22 Januarie in hegtenis geneem danksy intelligensie-gedrewe optrede deur die SAPD.Die saak is tot 10 Mei 2023 uitgestel vir ‘n formele borgtogaansoek.
