Deur Doreen Mokgolo
‘n Groep van 10 mans het wind en weer trotseer tydens ‘n 274 km-lange staptog vanaf Polokwane tot by die Uniegebou in Pretoria – dis hoe ernstig hulle voel oor geestesgesondheid.
Die groep, wat van Tzaneen in Limpopo afkomstig is, het Maandagmiddag in die hoofstad aangeland na 10 dae van voetslaan.
Hulle doel is om ander mans aan te moedig om oor hul probleme te praat.
Hierdie probleme sluit in verbale en fisiese mishandeling – kwessies waaroor mans dikwels te verleë is om te bespreek.
Hulle hoop dat hul 10 dae lange trek bewusmaking sal aanhelp en sodoende beide mans en seuns sal verhoed om in stilswye te ly.
Die leier van die groep is Matalane Mokgatla, ‘n sePedi-digter en skrywer wat al vir jare lank sosiale media gebruik as platform vir mans om van hul ervarings te deel.
In November het Mokgatla Afrika se hoogste berg, Kilimanjaro in Tanzanië, bestyg in ‘n poging om mans aan te moedig om oor mishandeling te praat.
Tydens hierdie jongste veldtog, sê Mokgatla, het mans hom op sosiale media oorval met vertellings van hul lyding, veroorsaak deur mishandeling binne hul gesinne en die gemeenskap.
Hy het gesê die stap daag mans uit om oor hul probleme te praat en nie in stilte te sterf nie.
“In ons swart gemeenskappe word mans van jongs af verbied om kwesbaarheid te toon, aangesien mans wat hieroor uitgesproke is as swakkelinge beskou word.
“Seuns word van kleins af mishandel en koester daardie pyn. Hulle word dan mishandel as volwasse mans, maar die samelewing verwag steeds van hulle om sterk te staan.
“Dit is dieselfde mans wat ons susters vermoor en sinnelose misdade pleeg omdat hulle aan soveel pyn vashou,” het hy gesê.
Mokgatla het bygevoeg dat hulle die lang staptog aangepak het in die hoop om meer mans te sien uitreik vir hulp om hul pyn te verwerk en berading te ontvang.
Op sy Facebook-blad het hy kanale voorgestel waar mishandelde mans hulp kan verkry.
Op die foto hierbo: Tien mans het van Polokwane na die Uniegebou gestap en mans aangemoedig om te praat oor hul pyn
Fotobron: Verskaf
