Deur Songeziwe Mapukata
Polisieduikers is steeds op soek na die lyk van ‘n 40-jarige man wat verlede Donderdag verdrink het nadat swaar reën oorstromings in Port St John’s veroorsaak het.
Dit is die tweede sarsie vloede wat die klein kusdorpie aan die mond van die Umzimvubu-rivier, 70 km oos van Mthatha, tref en ‘n massiewe spoor van vernietiging saai.
Die liggaam van ‘n 18-jarige is Sondag om 12nm gevind, na dit by die Luthezanerivier uitgespoel het.
Asenathi Mkawusi se dood is deur die Oos-Kaapse polisie bevestig. Hy was die eerste amptelike slagoffer, gevolg deur die ontdekking van Fumanekile Ntshubaqa, 53, wie se liggaam byna drie uur later op Grosvenor-strand gevind is.
“Die derde slagoffer, Mhlabunzima Sikhathele, 40, het ook Donderdag in die Luthezanerivier verdrink, en is nog nie gevind nie. Duikers is steeds besig om die gebied vir hom te fynkam,” het brigadier Tembinkosi Kinana aan Scrolla.Africa gesê.
Kinana het bygevoeg dat die polisie twee geregtelike doodsondersoeke geopen het.
Port St John’s burgemeester, Nomvuzo Mlombile-Cingo, het gesê die dorp het ‘n dreineringstelselkrisis. Dit lei tot vloede wat grootskaalse pandemonium veroorsaak.
Sy het met Scrolla.Africa gepraat oor hoe die dorp steeds nie herstel het van die massiewe ramp wat hulle in April verlede jaar getref het nie.
“Ons grootste bekommernis op die oomblik is toegang tot dienste vir ons plaaslike mense, want grondverskuiwings maak dit baie moeilik. Daar is meer as sewe grondverskuiwings wat dorpies rondom ons afsny en dit onmoontlik maak om kos te koop. Selfs wanneer ons probeer om die geblokkeerde paaie skoon te maak, vererger die omvang van die skade.
“Voor hierdie ramp het ons ‘n agterstand van 40 brûe gehad wat nog gebou moes word om die impak van die swaar neerslae teen te werk. Nou is selfs meer brûe deur hierdie vloed vernietig.”
Port St John’s Munisipaliteit val onder OR Tambo Distriksmunisipaliteit, wat steeds deur swaar reën geteister word. Verlede maand het stortreën verwoesting gesaai by Koffiebaai – nog ‘n toeristebestemming.
“Ons dreineringstelsel het dringende opknapwerk nodig in meer as 20 wyke. Selfs al is daar met die werk begin, is ons nou swaar getref deur hierdie ramp – pynlik so. Dit is baie moeilik om in die somer se stortreën te werk maar ons hoop dat ons geluk in die winter sal draai.”
Terwyl hulle voortgaan om behoeftiges te help, sal die bevelsraad weer vandag [Maandag] byeenkom.
Op die foto hierbo: Drie mense het in die onlangse vloede rondom Port St Johns verdrink
Fotobron: Verskaf
