Deur Anita Dangazele
Die droogte-geteisterde Nelson Mandelabaai (NMB) sal 10 000 liter water per dag by hulle stelsels toevoeg.
Dit kom in die vorm van die wêreldklas St Georgepark Wellfield waterprojek, wat Dinsdag amptelik oopgestel is.
Die projek, teen ’n koste van R40 miljoen, is geskep om grondwater te onttrek, te behandel en in die waterstelsel te versprei.
Die agt-jaar-lange droogte het onder meer daartoe gelei dat die stad se vernaamste damme gesluit is, en is die ergste nog opgeteken in die gebied.
Die algehele damkapasiteit staan op net meer as 12%. Die munisipaliteit se ingenieurs skat die damme kan teen Julie vanjaar droog wees.
In ’n poging om die gevolge van die droogte te versag, het die munisipaliteit verskeie waterprojekte geskep. Dit sluit die bykomende gebruik van grondwater (boorgate), suiwering, en regstreekse en onregstreekse hergebruik van water in.
NMBM se waterverspreidingdirekteur, Joseph Tsatsire, het gesê die jongste projekte, wat daarop gemik is om die water-infrastruktuur te versterk, neem vorm aan.
“Ons is baie opgewonde. Ons gaan die impak van die droogte verminder, en in die toekoms beter weerstand teen ’n watertekort bied,” het Tsatsire gesê.
Maar die NMBM se uitvoerende burgemeester, Retief Odendaal, sê hy is teleurgesteld dat inwoners se waterverbruik nie na die vereiste vlakke gedaal het nie.
Die adjunk-burgemeester, Mkhuseli Jack, het hierby aangesluit en inwoners gevra om nie meer as 50 liter per persoon per dag te gebruik nie.
“Ons is daartoe verbind om die berugte dag zero te verhinder. Maar die inwoners sal ons moet help deur by die vereiste perke te hou,” het Jack gesê.
Die munisipaliteit het ’n intensiewe kommunikasie-veldtog begin om inwoners in te lig oor die huidige waterkrisis.
In die foto hierbo: NMB se adjunk-burgemeester, Mkhuseli Jack, sny die lint by die wêreldklas St George-Wellfield waterprojek
Fotobron: Anita Dangazele
