Deur Doreen Mokgolo
Hulle was op ’n tyd gevrees in hulle skole se gange en klaskamers. Nou lei ’n groep van tien gewese bendelede ’n veldtog teen bendes in hoërskole in Duduza.
Die voormalige oortreders het ’n nuwe blaadjie omgeslaan en ambassadeurs vir ’n veldtog met die naam #30days geword.
Die veldtog vind plaas onder toesig van die Skeem GP Stigting, ’n organisasie wat werk met mense op parool of toesig, voormalige oortreders, en misdaadslagoffers.
Maandagoggend het die groep Hoërskool Esibonelwesihle besoek, waar hulle hulle tydgenote gemotiveer het om op hulle studies te fokus en bestaande bendes te ontbind.
Die groep weet uit eie ervaring dat bendes met ’n ysterhand oor ’n skool kan regeer. Leerders word gedwing om respek aan bendelede te betoon, of deur te loop onder hulle geweld. Die groep het die leerders raad gegee oor maniere waarop hulle kan verhinder dat hulle by bendes betrek word.
Gewese gevangene Themba Lukhele het vertel hoe sy jong lewe verwoes is. Hy was maar 15 die eerste keer wat hy in hegtenis geneem is.
“Ek was jonk en ek wou respek afdwing. Ek het gedink dis cool om ’n vuurwapen skool toe te bring, maar dit het my in die tronk laat beland,” het hy gesê.
“Deur my lewensverhaal te deel, kan ek ten minste een tiener wat swaarkry uit die tronk hou.”
Die hoof bedryfsbeampte van Skeem GP, Solly Mankga, was ook in die tronk. Hy sê die stigting wil misdaad en dwelms in skole beveg en leerders wat met bendes verbind is rehabiliteer.
“As gerehabiliteerde gewese gevangenes wil ons leerders oplei om modelburgers van die land te word,” het hy aan Scrolla.Africa gesê.
“Ons het gevind dat leerders dwelms aan ander leerders by skole verkoop.” Hy het beloof dat hulle enigeen wat die pad byster geraak het op die regte koers sal help.
Wyk 86 se raadslid, Nsizwa Mekgwe, het gesê hulle sal misdaad aanhou beveg en dwelmgebruik by skole in die gebied stopsit.
Foto deur: Ambassadeurs teen bendebedrywighede in Duduza se skole
Video:Themba Lukhele motiveer leerders
Foto en video: Doreen Mokgolo
