Deur Anita Dangazele
Net oorkant Nelson Mandelabaai Stadion in Gqeberha sien mens deesdae ‘n klein huisbootjie dobber in die middel van die North End-meer.
Dit is Tashwill Nkili se nuwe tuiste.
Nkili, 21, het in die plattelandse dorp Somerset-Oos grootgeword, en in Desember laas jaar na Gqeberha verhuis op soek na werk. Hy was onaangenaam verras om uit te vind dat, wat werk aanbetref, die groot stad net so min geleenthede het as sy tuisdorp.
“Ek is in Worcester in die Wes-Kaap gebore en het saam met my ma Somerset-Oos toe verhuis, waar sy gehoop het om werk te vind. Sy is oorlede, en ek is deur ‘n ander familie aangeneem, maar dinge is moeilik [daar],” het Nkili gesê.
Die ontberinge tuis het hom verhoed om terug te keer na Somerset-Oos, en Nkili het op die strate van Gqeberha begin woon.
Hy het aangesluit by ‘n klein gemeenskap van hawelose mense wat op die oewer van die North End-meer kampeer. Tydens hierdie ervaring het die idee van ‘n huisboot ontstaan.
Die rede vir die skuif, volgens Nkili, is dat dit baie veiliger was as om op die meer se wal te woon.
“Om langs die meer te woon is gevaarlik. Mense word dikwels beroof of aangeval, of amptenare kom breek die hutte af, en dan moet jy van vooraf bou.
“Ek dog toe, hulle kan nie my huis afbreek as hulle nie daarby kan uitkom nie. ‘n Huis wat op die meer dryf was die perfekte uitweg,” het hy gesê.
Die dek van Nkili se drywende huis is bedek met stukke hout en metaal, en die kante is opgebou met planke en ander materiale.
Die dak is bedek met plastieksakke, terwyl die kajuit met ou beddegoed uitgevoer is. ‘n Klein deurtjie lei van die kajuit na buite.
Nkili het aan Scrolla.Africa gesê hy droom daarvan om ‘n professionele bokser te word sodat hy sake by die huis kan verbeter.
Op die foto hierbo: Tashwill Nkili sit by die deur van sy huisboot
Fotobron: Anita Dangazele
