Deur Thathe Msimango
Drie van Afrika se beste hardlopers, wat blykbaar nooit kortasem raak nie, maak volgende maand deel uit van ‘n elite-groep wat die 10 km afstand gaan aanvat.
Die Statebond se silwermedaljewenner, Daniel Simiu Ebenyo, sal in April nael vir ‘n wen in die eerste Run Your City Gqeberha 10K byeenkoms.
Die wedren is die eerste van vyf 10 km-resiese – die res vind plaas in Durban, Johannesburg, Kaapstad en Pretoria.
Die Keniaan, met ‘n top 10 km-tyd van 26 minute 58 sekondes, gaan die podiumstryd aansê teen Ugandese ster Samuel Kibet en plaaslike blits Melikhaya Frans.
Die wedlope sal na verwagting befaamde internasionale atlete lok, wat plaaslike hardlopers sal help om beter tye te behaal.
Ebenyo is geen vreemdeling langs Suid-Afrikaanse hardlooproetes nie, aangesien hy reeds twee keer, in 2021 en 2022, die Cape Town Run Your City gewen het.
Nadat hy as een van die aanspraakmakers uitgewys is, het Ebenyo gesê hy is opgewonde oor die komende kompetisies.
“Ek is verheug om weer in Suid-Afrika deel te neem. Dit is ‘n wonderlike land met sportmense vol passie, so om weer daar te hardloop sal wonderlik wees vir my loopbaan,” sê Ebenyo, wat die huidige Afrika 5,000 m kampioen is.
“Ek het gehoor die roete is ‘n plesier, veral omdat die weer mooi gaan wees en die pad plat is. My oefenprogram het volgens plan verloop, wat ‘n puik prestasie op die dag beloof.”
Met die vinnigste 10 km ooit in Suid-Afrika gehardloop binne 27 minute 16 sekondes, is Ebenyo oortuig dat hy die tyd wat Uganda se Joshua Cheptegei in Durban in 2018 opgestel het, kan klop.
“Ek is bly hulle het iemand soos Samuel Kibet by die wedloop betrek. Hy is kragtig en fors en sal my druk om nog vinniger te hardloop,” het hy gesê.
“Ek wil die beste tyd ooit op Suid-Afrikaanse bodem behaal. Dit is moontlik met mooi weer en goeie atlete in die veld. En natuurlik beplan ek om die wedloop te wen. My baanrekord spreek vanself, want ek het sover al my Suid-Afrikaanse wedrenne gewen.”
Ebenyo het in Februarie sesde gekom in die Wêreldatletiek-landloopkampioenskap 10 km-wedloop in Australië, en was vierde in die 2022 Wêreldbinnehuise 3 000 m-finaal.
Op die foto hierbo: Daniel Ebenyo
Fotobron: Pinecrest
