Deur Khaya Ndaba
Nes die kunstenaar wat dit geskep het, is Buhlebezwe Siwani se krities bekroonde nuwe vertoning iYeza op pad Johannesburg nadat dit in die Oos-Kaap die lig gesien het.
Siwani, 35, is ‘n multidissiplinêre kunstenaar wat ‘n ongelooflike reeks materiale gebruik om haar kuns op te tower, insluitend seep, wol en selfs haar eie lyf.
Die uitstalling waaroor kunsliefhebbers in die Oos-Kaap so gaande was, handel oor spiritualiteit, inheemse praktyke, kultuur, geskiedenis en godsdiens, soos gade geslaan deur die swart vroulike liggaam.
Die uitstalling word tans by die Standard Bank Galery vertoon ter viering van Siwani se sege as Standard Bank Jong Kunstenaar vir Visuele Kuns 2021.
iYeza put uit Siwani se herinneringe, lewensreis en praktyk as geïnisieerde tradisionele geneser.
“iYeza spreek natuurlike maniere van genesing aan. Die installasie sluit die elemente van water, grond en lug in, as simbool van wat die natuur vir Afrikane kan doen om die liggaam, gees en siel te genees,” het sy aan Scrolla.Africa gesê.
Siwani het haar BA in Beeldende Kunste in 2011 aan Wits Kunsskool voltooi, en haar Meestersgraad aan Michaelis Skool vir Beeldende Kunste in 2015.
Sy is veral bekend vir haar uitvoerende kunswerke insluitend Qunisa!, Black Heidi, en Zemnk’inkomo Magwalandidni, waar sy haar liggaam as ‘n skilderdoek gebruik om haar storie as geestelike wese oor te dra.
Die vertonings bied ‘n meesleurende ervaring want sy gebruik materiale wat die sintuie aangryp, soos beesmis, water, videoprojeksies, grond en gras, om met die werklikheidspersepsie van haar gehoor te speel.
Ná Johannesburg sal Siwani se werk vanaf April by die Suid-Koreaanse Biënnale in Gwangju vertoon word.
Op die foto hierbo: Buhlebezwe Siwani
Fotobron: Verskaf
