Deur Buziwe Nocuze
Die familie van die 23-jarige Zolani Toyana, wat verlede naweek wreed vermoor is in Khayelitsha, was teleurgesteld nadat die verdagte borgtog van slegs R1,000 toegestaan is.
Die verdagte, ‘n 17-jarige meisie, is op ‘n aanklag van moord in hegtenis geneem nadat sy hom na bewering met ‘n gebreekte bottel gesteek het.
Volgens sy familie het Toyana verlede naweek ‘n groep van vyf tienermeisies by ‘n taverne ontmoet. Hy het een van hulle gevra om saam met hom huis toe te gaan.
‘n Onderonsie het begin nadat die meisie se suster glo tussenbeide getree en gesê het sy mag nie saam met hom gaan nie.
Die meisie se suster het ‘n bierbottel gebreek en die slagoffer na bewering in die maag begin steek. Die ander vier meisies het glo by die aksie aangesluit. Toyana is op die toneel dood.
Die verdagte het Dinsdag 20 Februarie in die Khayelitsha-hof verskyn en is op die skamele borgbedrag vrygelaat.
Die saak is tot 19 April 2023 vir verdere ondersoek uitgestel. Zukiswa Toyana, Zolani se ma, het haar teleurstelling uitgespreek en gesê dat die persoon wat na bewering haar seun se lewe geneem het, vry rondloop.
“Sy het my seun soos ‘n hond afgemaak, maar sy kom weg daarmee om net R1,000 te betaal. Sal dit my seun terugbring?” vra sy deur die snikke.
Toyana sê sy hoop dat haar seun se moord nie net nog ‘n statistiek sal wees nie, en dat die oortreder agter tralies sal vrot.
Erica Ntabazalila, die Nasionale Vervolgingsgesag se streekswoordvoerder, het bevestig dat die verdagte borgtog van R1,000 toegestaan is en dat haar saak tot 19 April uitgestel is vir verdere ondersoek.
Op die foto hierbo: Die verdagte, ‘n 17-jarige tiener is in hegtenis geneem op aanklag van moord nadat sy Toyana na bewering met ‘n gebreekte bottel gesteek het; sy het in die Khayelitsha-landdroshof in Kaapstad verskyn en is borgtog van R1 000 toegestaan.
Fotobron: Buziwe Nocuze
