Deur Doreen Mokgolo
Teka Matsepane het besluit sy passasiers moet internet hê wanneer hy hulle in sy taxi karwei.
Voordat hy soggens by sy huis wegry, maak Teka, ’n inwoner van Kwa-Thema, Ekurhuleni, seker hy het genoeg data gelaai vir die hele dag se onbeperkte internet-toegang.
In die taxi is daar ’n groot teken in vet letters wat sy passasiers, meestal skoolgangers en studente, herinner daar is onbeperkte WiFi aanboord, en deel sy wagwoord met hulle.
Hy het aan Scrolla.Africa gesê hy het twee jaar gelede besluit om sy taxi met WiFi toe te rus. Dit was nadat hy leerders hoor sê het hulle kon nie hulle huiswerk doen nie, want hulle ouers het nie geld vir data nie.
“Ek het navraag gedoen en uitgevind skole en ander openbare instellings het nie gratis WiFi nie. Dit het beteken as hulle nie geld vir data het nie, kan hulle nie ’n internet-verbinding kry of aanlyn-navorsing doen nie.
“Deur my eie kinders met huiswerk te help, het ek gesien hulle moet gereeld aanlyn gaan vir navorsing,” het hy gesê.
Hy sê die koste pla hom nie, want hy vervoer die jong passasiers al jare lank.
“Hulle is nou my familie,” het hy gesê.
Party van sy ouer gereelde klante wat nou al werk ry al 22 jaar saam, vandat hulle op laerskool was.
“Ná skool het ek gesien hoe hulle hulle kollege-opleiding klaarmaak. Noudat hulle volwassenes is, vertrou hulle nog steeds my diens.”
Matsepane se volgende doelwit is om sy verafgeleë nedersetting, Ga-Phaahla, Jane Furse in Limpopo, van internet-toegang te voorsien deur middel van ’n transformator wat vir dié doel geskep is.
“Daar is geen verbinding nie. Mens moet teen ’n nabye berg opklouter daarvoor,” het hy gesê,”
“Dit beteken leerders in die gebied raak agter ander wat in meer ontwikkelde townships woon.”
Nog ’n groter droom: Hy wil sien hoe alle leerders toegang tot die internet kry en met die wêreld verbind word.
In die foto hierbo: Teka Matsepane
Fotobron: Doreen Mokgolo
