Deur Thathe Msimango
Wanneer die Dusi-kanomarathon Donderdag by Pietermaritzburg begin, sal Msawenkosi Mtolo op sy witwarmste vertoon in sy poging vir ‘n podiumplek.
Die geskiedkundige 120 km wedren vind jaarliks oor drie dae plaas, met die Umsunduzirivier as beginpunt. Dit eindig Saterdag by Blue Lagoon in Durban.
Vanjaar sal alle oë op Mtolo wees terwyl hy streef om geskiedenis te maak as die eerste swart roeier wat die Dusi as individu wen.
In 2008 was die swart veteraan-kanovaarder Thulani Mbanjwa mede-wenner van die wedvaart, toe hy saam met Martin Dreyer in ‘n K2-kano geroei het.
Die 25-jarige Mtolo sê hy het alles in sy vermoë gedoen om ‘n wen te beklink.
“Die voorbereidings op pad wedrendag toe was van so ‘n standaard dat ek voel ek sal regdeur die byeenkoms kompeterend kan wees,” het hy aan Scrolla.Africa gesê
“Ek het alles gedoen wat ek dink nodig sal wees. Ek is op pad Dusi toe met baie gedagtes wat in my kop rondmaal, aangesien ek ‘n plan A en B het om voorbereid te wees vir wat ookal in die rivier mag gebeur. Die goeie nuus is dat ek geen beserings het nie.”
Mtolo, wat in die Mkhambathini-vallei woon, gebruik altyd die Dusi-roete om te oefen, wat hom ‘n tuisvoordeel gee.
“Ek het die watervlak nagegaan en dit is ‘n bietjie hoër as gewoonlik. Ons het die afgelope twee maande meer reën ontvang, wat die rivier voller gemaak het. Ek ken die roete omdat ek daar oefen, so ek het nie eintlik probleme met die watervlak nie,” het hy gesê.
Op die vraag of hy ‘n wedren-gunsteling is, het Mtolo nie die aas gevat nie – hoewel hy sy voorneme uitgespreek het om die wedren in die toekoms te wen.
“Is ek die gunsteling om te wen? Ek sal dit nie so stel nie, maar ek hoop om eendag te wen. Ek weet nie of dit vanjaar of volgende jaar gaan gebeur nie, maar uiteindelik sal dit gebeur.
“Dit is my droom,” het hy bygevoeg.
Mtolo het verlede jaar ‘n tweede plek in die K2-wedren behaal met Mbanjwa as mede-roeier.
Op die foto hierbo: Msawenkosi Mtolo
Fotobron: Verskaf
