Deur Buziwe Nocuze
Inwoners van die Never Never informele woonbuurt in Philippi is dakloos en woedend nadat ’n brand Woensdag hulle plakkershutte verwoes het. Hulle sê ’n kragstuwing het ’n vonk in een van die hutte veroorsaak, wat tot die brand gelei het.
Een honderd en dertig hutte is verwoes, en 333 mense is dakloos.
Asof dit nie erg genoeg was nie, het booswigte party mense beroof van hulle karige oorblywende goedjies.
Donderdagoggend het inwoners nog tussen die puin gekyk of hulle iets kon red. Ander inwoners het hulle hutte begin herbou, al was die brand nog nie behoorlik geblus nie.
Nomawethu Sawutana, ’n straatkomiteelid, het moedeloos aan Scrolla.Africa gesê: “Beurtkrag gaan ons einde beteken. Ons het al so baie verloor dat ons nie die geld het om ons goed te vervang nie.”
’n Ander inwoner het ook gesê beurtkrag het ’n rol gespeel, maar meen iemand het vergeet om hulle stoof af te skakel nadat beurtkrag ingeskop het.
“Soms moet ons verantwoordelik vir ons eie probleme aanvaar. Hoe kan iemand hulle stoof aan vergeet as almal preek dat ons ons elektriese toestelle tydens beurtkrag moet uitprop?”
Sawutana het vertel van ’n paartjie wat ’n wasmasjien en TV kon red, maar toe hulle dié elders wou neem, is hulle ander goed gesteel.
“Dit maak my woedend,” het Sawutana gesê.
’n Ander inwoner, Sivuyile Mbana, 45, het by die werk van die brand gehoor en hom huis toe gehaas, maar dit was tevergeefs.
“Ek het nou net vir my kinders skoolklere gekoop. Ek verpes beurtkrag. Ek wens die mense wat dit veroorsaak kon sien wat hulle met ons lewens maak.”
Vennessa Scholtz, segspersoon vir Kaapstad se Brandweer en Reddingsdiens, sê geen beserings is aangemeld nie.
In die foto hierbo: Never Never-nedersetting, waar ’n brand 333 mense Woensdag dakloos gelaat het.
Fotobron: Buziwe Nocuze
