Deur Thathe Msimango
Unathi Nxumalo is gewoond daaraan om berge op sy fiets aan te durf, en ’n professionele kontrak met die Pump for Peace-bergfietsspan gee sy loopbaan ’n welkome hupstoot boontoe.
Die 20-jarige maak ’n gedugte span saam met Faranak Partoazar en Tumelo Makae.
Nxumalo, wat in Hammarsdale township buite Durban grootgeword het, is ’n produk van die KZN ontwikkelings-fietsryprogram, met Johann Wykerd as programleier en afrigter.
“Ek is so bly ek kon ’n professionele kontrak met hierdie wonderlike span sluit. Ek het nooit gedink ek sou so goed presteer nie,” het hy aan Scrolla.Africa gesê.
“Ek dink die belangrike ding is om al my tyd aan sport af te staan. Dan sal daar goeie goed volg. Vandat ek met bergfietsry begin het, leer ek elke dag iets nuuts. Ek het ’n kontrak gekry as gevolg van die harde werk wat ek in wedrenne insit.”
Nxumalo het al ’n klomp dinge bereik. In 2021 het hy die land by die Wêreldkampioenskappe in Italië verteenwoordig, en laasjaar was hy vyfde in die Afrika-bergfietskampioenskap in Namibië
“Hierdie kontrak beteken ek kan aan die Wêreldreeks oorsee deelneem. Dit is van jongs af my droom om die wêreld vol te reis en die beste fietsryers te ontmoet.”
Nxumalo se ander droom is om weer sy land te verteenwoordig.
“Die Wêreldkampioenskappe vind in Augustus in Skotland plaas. Ek weet as ek hard werk, kan ek daardie droom ook laat waar word,” het hy gesê.
In die foto hierbo: Unathi Nxumalo
Fotobron: Verskaf
