Rotte waarin menslike selle oorgeplant is om ‘n “minibrein” te vorm, kan moontlik eendag wetenskaplikes help om breinbeserings te behandel.
‘n Span navorsers het onlangs materiaal uit ‘n menslike brein geneem en dit by ‘n rot se brein ingeënt. Binne weke het die menslike selle deel van sy neurale stelsel uitgemaak.
Wetenskaplikes glo ‘n soortgelyke prosedure kan moontlik wees om mense met breinbeserings by te staan.
Om dit by mense te doen, sal beteken dat velselle van die pasiënt geneem word en dit in “geïnduseerde stamselle” vermeng word voordat dit by die pasiënt ingeplant word.
Maar voordat hulle opgewonde raak oor die deurbraak se potensiaal, het die span gewaarsku dat die werk nog in die vroeë ontwikkelingstadium is, het The Times berig.
“Ons het nie net gefokus op die oorplanting van individuele selle nie, maar eintlik die oorplanting van weefsel,” het Professor Isaac Chen, die Universiteit van Pennsilvanië se senior studieskrywer, gesê.
“Breinorganoïede het argitektuur; hulle struktuur lyk soos dié van die brein. Ons kon na individuele neurone in hierdie struktuur kyk om ‘n dieper begrip van die integrasie van oorgeplante organoïede te kry.”
Die “minibrein” is gevorm deur die menslike selle te neem en hulle vir 80 dae in ‘n laboratorium te laat groei. Van daar af is die selle in die visuele korteks van die rot ingespuit. Binne 90 dae het die menslike selle met die rotbrein geïntegreer.
“Ons het nie verwag om hierdie mate van funksionele integrasie so vroeg te bespeur nie,” het Chen gesê.
“Neurale weefsels het die potensiaal om areas van die beseerde brein te herbou. Ons het nog nie alles uitgewerk nie, maar dit is ‘n gewigtige eerste stap.”
Saamgestel deur Dylan Bettencourt
Op die foto hierbo: ‘n Laboratoriumrot se lewe is g’n lied nie
Fotobron: iStock
