Deur Dylan Bettencourt
In die laat 1930’s het die Joodse egpaar Karl en Rosi Adler probeer om uit Nazi-Duitsland te vlug, maar het geld gekort vir ‘n visum.
Al uitweg wat vir die egpaar oorgbly het, was om hul mees kosbare besitting prys te gee: ‘n skildery genaamd “Woman Ironing” wat in 1904 deur Pablo Picasso geskilder is.
Die skildery het slegs vir ‘n korttermynvisum betaal, maar dit het die egpaar se lewens gered toe Nazi-Duitsland Joodse mense in die land begin afmaai het.
Die skildery het sedertdien ‘n lang pad gereis om die Solomon R Guggenheim-museum in New York te bereik.
Maar erfgename van die Adler-familie wil nou die skildery terughê, het die BBC berig.
“Adler sou nie van die skildery ontslae geraak het op die tydstip en teen die prys wat hy gevra het, as dit nie was vir die Nazi-vervolging waaraan hy en sy gesin onderwerp was nie. Dit sou sy voorland wees,” het die erfgename se prokureurs geskryf in ‘n regsgeding wat verlede week in ‘n hof in New York aanhangig gemaak is.
Die skildery is in 1916 by Heinrich Thannhauser, ‘n Joodse galeryeienaar wat in München woonagtig was, gekoop.
Toe Karl en Rosi uit Duitsland vlug, het hulle die skildery aan Thannhauser se seun, Justin, vir R27,000 verkoop.
Adler se prokureur voer aan dat die verkoopprys benede markwaarde was, gegewe die dringendheid om uit Duitsland te ontsnap.
Die prokureurs beweer dat Karl net ses jaar voor dit ‘n aanbod van R240,000 vir die skildery ontvang het.
Toe Justin die skildery gekoop het, het hy dit dadelik vir R345,000 verseker.
Thannhauser het sy kunsversameling aan die Guggenheim gelaat voor sy afsterwe, en as deel van sy navorsing het die Guggenheim-organisasie uitgereik na Karl en Rosi se seun, Eric Adler.
Eric “het die datums van sy pa se eienaarskap bevestig, en het geen kommer uitgespreek oor die skildery of die verkoop daarvan aan Justin Thannhauser nie,” lui ’n verklaring deur die museum.
In 2014 het die kleinseun van Karl en Rosi se ander kind, Carlota, egter met regsaksie begin om die skildery terug te kry.
Terwyl die hofsaak voortsleep, bly die hantering van kuns wat deur Nazi’s gekonfiskeer is ‘n kopseer vir galerye en museums.
In 1998 het 44 lande die Washington-beginsels oor Nazi-gekonfiskeerde kuns onderteken, wat verduidelik dat “stappe vinnig geneem moet word om ‘n gepaste en regverdige oplossing te bereik, in ag genome dat dit kan verskil volgens die feite en omstandighede rondom ‘n spesifieke saak”.
Op die foto hierbo: Die Pablo Picasso-skildery, Woman Ironing
Fotobron: Etsy
