Deur Dalphine Tagwireyi
Sy laat die doek lewe – met haar tone.
Nompilo Nkomo, 41, van Bulawayo is gebore met misvormde voete en hande. Sy sukkel ook om samehangend te praat.
Maar sy is ‘n skonekunstenaar wat haar linkervoet gebruik om te skilder. Sy gee hoop aan diegene wat haar “Journey of a Lifetime” versameling aanskou.
Nkomo is ‘n lewende voorbeeld dat jy jou lot kan omkeer en fokus op die vermoë om jou talent te gebruik om herinneringe te skep wat jou ‘n leeftyd bybly.
“Ek weier om deur my gestremdheid gedefinieer te word, dis hoekom ek doen waarvoor ek lief is,” het sy aan Scrolla.Africa gesê. “Ek wil nie hê mense moet op my neersien of simpatiseer met my toestand nie, want dit is nie wie ek is nie. Ek is ’n visuele kunstenaar.”
Om albei haar ouers te verloor toe sy nog ‘n kleuter was, het haar nie afgeskrik nie. Sy is grootgemaak deur haar ouma wat ‘n gemaklike omgewing vir haar geskep het sodat sy in die kunste kon uitblink.
Haar werk verbeeld uiteenlopende realiteite wat mense ervaar deur hul hantering van gemeenskapskwessies, lewe en dood, godsdiens, ekonomie, kos, liefde, geslagssake, en grond- en omgewingskwessies.
“My vernaamste vaardigheid lê in tekstiel en skilder. Ek vertel alledaagse Zimbabwiese stories deur hierdie skilderye,” het sy gesê.
Nkomo het haar visuele kunsloopbaan by die Mzilikazi Kuns- en Handwerksentrum in Bulawayo begin. Sy spandeer nou haar dae met kwas in die hand by haar eie ateljee in dieselfde stad.
Haar kunswerke is al uitgestal by galerye in Zimbabwe en by feeste in Duitsland, Tanzanië en Namibië. Sy floreer wanneer sy haar doeke laat lewe kry deur verf, knope en skulpe te gebruik.
Nkomo stal ook haar werk uit by spesiale skole se kunsfeeste in Zimbabwe. Haar lewe en werk dien as aanmoediging en bied hoop aan gestremde kinders.
Op die foto hierbo: Nompilo Nkomo en een van haar kunswerke
Fotobron: Verskaf
