Deur Anita Dangazele
Meer as 1 000 leerders in die uitrustings van ’n klomp verskillende skole het Laerskool Enkululekweni se gronde Woensdag binnegestroom en op onderrig aangedring.
Die leerders, van NU12 in Motherwell, ’n woonbuurt in Gqeberha, kon nog geen klasse bywoon nie, omdat bouwerk aan die skool nog nie afgehandel is nie.
Nowezile Tyali, ’n ouer, het gesê hulle wil hê die kinders moet in die voltooide deel van die skool onderrig word. Hulle hoop die kinders se teenwoordigheid sal druk op die boukontrateurs en die Departement van Onderwys plaas.
Konstruksiewerk aan die laerskool het in 2021 begin om leerders van NU12 te bedien.
Ouers en leerders het geveg vir die oprigting van die skool omdat hulle gesukkel het om plek in nabygeleë skole te kry.
Volgens ouers het skole in die omtrek gekla dat baie kinders van NU12 klasse misgeloop het omdat daar nie vir almal plek op busse was nie.
Leerders moes etlike kilometer stap om by skole in NU7 en NU12 uit te kom.
Daar is aan ouers gesê die nuwe skool sou gereed wees vir die begin van die 2023 skooljaar, maar Dinsdag was onderwysers nog besig met vergaderings terwyl konstruksiewerk voortgaan.
Na verwagting sal meer as 1100 leerders Laerskool Enkululekweni bywoon wanneer die bouwerk eendag klaar is.
Twee seuns wat vrugte verkoop terwyl hulle wag dat die skool heropen, het die pad na die skool aan Scrolla.Africa beduie.
Gogo Nancy Bam het gesê sy is bang haar drie kleinkinders raak agter.
“My kleinkinders was voorheen in Laerskool Imbasa in NU12 en moes skool toe stap. Dit was kommerwekkend, want hulle is beroof, en nou het hulle glad nie ’n skool nie.”
’n Inwoner wat naby die skool woon, Nosipho Minyayo, het gesê konstruksiewerk is in Oktober gestaak en werkers het eers twee weke gelede na die perseel teruggekeer.
Die raadslid vir die gebied, Lunga Minyayo, het gesê daar was vertragings met die installering van waterdienste en die uitreiking van sertifikate vir die oorhandiging van die perseel.
Malibongwe Mtima, segspersoon vir provinsiale onderwys, het gesê die skool was nie deel van verlede jaar se begroting nie, maar die departement het toegestem ná druk uit die gemeenskap.
“Aangesien ons nie vir die skool begroot het nie, moes die departement die oorskot van ander projekte verkry,” het hy gesê.
Mtima het gesê die departement mik daarna om die skool in die eerste week in Februarie gereed te hê.
Die maatskappy in beheer van die konstruksieprojek het geweier om kommentaar te lewer.
In die foto hierbo: Kinders buite Laerskool Enkululekweni
Fotobron: Anita Dangazele
