Deur Thathe Msimango
Ten spyte daarvan dat Siyanda Gumede eers vier jaar gelede professioneel begin fietsry het, gedra hy hom deesdae soos ‘n veteraan van die sport.
Gumede het die afgelope naweek die KwaZulu-Natalse Padfietsrykampioenskap se elite-kategorie gewen. Die byeenkoms is gehou in die heuwels van die Drakensberge in die Underberg-streek.
Die 22-jarige fietsryer sê die roete wat op rendag gebruik is, het tot sy oorwinning bygedra.
“Ek is bly dat ek die KZN-kampioenskappe gewen het. Vir my is dit is nog ‘n treetjie nader daaraan om hierdie sport te bemeester,” het hy aan Scrolla.Africa gesê.
“Wat in my guns getel het oor die naweek was dat ons roete klomp heuwels ingesluit het. Ek is sterk wanneer dit by opdraandes kom, so ek was nooit onkantgevang op my pad na die wenstreep toe nie.”
Gumede is in Hammarsdale buite Durban gebore. Hy sê sy liefde vir fietsry is aan sy ouers te danke.
“Fietse was my nog altyd baie na aan die hart. Ek was heeltyd in die saal en het uiteindelik by die sport aangesluit. Daar is baie swart mense wat verlief geraak het op fietsry en dit is goed om te sien,” het hy gesê
Die naweek se wen beteken dat die jongeling van Team Siata Fietsryklub sy hoogs-begeerlike kaartjie bespreek het om die provinsie op 12 Februarie by die nasionale kampioenskappe in Kaapstad te verteenwoordig.
“Ek het ook in 2021 aan hierdie kampioenskappe deelgeneem. Die kompetisie word strawwer wanneer jy teen die land se topryers te staan kom. Ek glo ek het uit daardie ervaring geleer en ek hoop om dit tot my voordeel te gebruik. Ek sal tevrede wees as ek binne die top 10 kan eindig.”
Op die foto hierbo: Siyanda Gumede
Fotobron: Verskaf
