By Buziwe Nocuze
Kaapstadse skrywer Philasande Phinzi kon beswaarlik sy ore glo toe hy van vriende verneem dat sy boek ‘n verskyning op Scrolla.Africa gemaak het. Maar die oomblik is versuur deur slegte nuus.
Nwabisa Mgoqi is ‘n groot aanhanger van Phinzi se isiXhosa-gedigte. Toe die boewe wat haar onlangs wou beroof uitvind dat sy slegs Phinzi se boek en ‘n buskaartjie in haar handsak het, is sy gedwing om haar gunsteling gedigte aan hulle voor te dra.
Phinzi het besluit om met Scrolla.Africa in aanraking te kom sodat hy Mgoqi kon beloon vir haar bewondering van sy werk, ten spyte daarvan dat dié feit op so ‘n aweregse manier aan hom bekend geword het.
“Ek kon dit nie glo nie – ek moes eenvoudig die storie gaan opsoek. Ek was verheug, maar terselftertyd hartseer oor die arme slagoffers se lot,” sê hy.
Hy het as tiener vir die eerste keer sy hand aan die pen geslaan.
“Skryf was ‘n stokperdjie in my jongdae. Selfs vriende het gevra of ek hul liefdesbriewe aanmekaarslaan. Ek het my eerste gedig in 2014 geskryf,” vertel hy.
Phinzi het belowe om vir Mgoqi ‘n kopie te gee van sy nuwe boek, Sidiliya Sentshabalalo, sodat sy dit tuis of by die werk kan lees.
“Ek kan my net indink watter trauma sy beleef het terwyl sy my gedigte moes voorlees. Dit was ‘n aaklige ondervinding en ek hoop nie sy haat dit voortaan om te lees nou nie.
Sy gaan die eerste mens wees wat uitgawes sal hê van die boeke wat ek nog beplan om te druk. Sy’t nie verdien om so geboelie te word nie, en ek hoop sy herstel binnekort.”
Mgoqi was in haar noppies oor die geskenk. “Ek’s steeds lief vir lees. Die nare ondervinding sal vervaag, en ek is dankbaar dat die skrywer so gaaf is met my.”
Sy het nie besef dat Phinzi haar storie sou lees nie. “Die feit dat hy uitgereik het en vir my sy boek gee, bewys dat hy omgee en stampvol umbuntu is.
“Ek kannie wag om die boek te ontvang en van hoek tot kant te lees nie,” sê sy.
Hierbo: Philasande Phinzi
Foto: Voorsien
